USAID د ۱۳۵ میلیونه تعلیمي کتابونو د چاپ او وېش دوهم پړاو پیلوي

منبع: آزادي راډیو
 
د امریکا د متحده ایالاتو نړيواله پراختیايي اداره «USAID» د افغانستان د پوهنې وزارت له لارې د ۷۵ میلیونه امریکايي ډالرو په ارزښت د ۱۳۵ میلیونه تعلیمي کتابونو د چاپ او وېش دوهم پړاو پیلوي.
په کابل کې د امریکا متحده ایالاتو سفارت ځانګړي شارژدافیر ښاغلي هوګو لارنس د سې شنبې په ورځ «۱۳۹۶ کال د لړم ۱۶» په کابل کې په دې اړه جوړو شویو مراسمو ته وویل چې ياده پروژه به د افغانستان د پوهنیز بهیر د پياوړتیا او معیاري کېدو سره ډېره مرسته وکړي.
نوموړي زیاته کړه:
"د دې پروژې هدف د ۱۳۵ میلیونه درسي او لارښود کتابونو چاپ او وېش دی چې ۷۵ میلیونه ډالره لګښت پرې راځي، که دغه پروژه په ښه توګه پلې شي نو پوهنیز کیفیت کې به د پام وړ بدلون راشي."
ښاغلي لارنس دا شان وویل، په افغانستان کې د پوهنې کمیت کې د پام وړ بدلون راغلی.
دغه پروژه د کتابونو د چاپ او وېش د هغې پروژې د دوام برخه ده چې لومړی پړاو يې له ۲۰۱۱ میلادي کال نه تر ۲۰۱۶ میلادي کاله پورې د افغانستان د حکومت او د امریکا د نړيوالې پراختیايي ادارې له‌خوا په پښتو، دري او انګلیسي ژبه د ښوونځيو د کتابونو د چاپ او وېش په هدف ترسره شوی و او ټاکل شوې چې دوهم پړاو يې په ۲۰۱۸ میلادي کال کې پیل او تر ۲۰۱۹ میلادي کاله پورې بشپړ شي.
د دغې پروژې له لارې به د لومړي ټولګي څخه تر ۱۲ ټولګي پورې د زده‌کوونکو لپاره درسي کتابونه او د ښوونکو لپاره ځانګړی لارښود کتابونه چاپ او ووېشل شي.
په ورته وخت کې د حکومت اجرائیه رئیس عبدالله عبدالله په دغې غونډه کې د وینا پر مهال د زده‌کوونکو او ښوونکو لپاره د درسي او لارښود کتابونو د چاپ او وېش دغه پروژه په هېواد کې د معیاري زده‌کړو لپاره مهمه وبلله او پر ښه پلي کېدو يې ټینګار وکړ.
ښاغلي عبدالله د امریکا متحده ایالاتو له دغې همکارۍ مننه وکړه او دا يې په افغانستان کې د باکفیته زده‌کړو لپاره يو بنسټيز ګام وباله.
 
نوموړي زیاته کړه:
"دا يو ډېر مهم ګام دی، د دې پروژې له لارې به موږ وکولای شو چې د پوهنې په برخه کې ستونزې په نښه او مخنیوی یې وکړو، د پوهنې په برخه کې تر ټولو لویه ستونزه د کتابونو د کمښت مسئله ده."
بل‌خوا د پوهنې د برخې يو شمېر متخصیصین په هېواد کې د پوهنیز بهیر په ښه کېدو ټینګار کوي او له حکومت څخه غواړي چې دغه پروژه په پوره شفافیت سره پلې او با کیفیته کتابونه زده‌کوونکو ته په واک کې ورکړي.