د پوهنې وزارت د نتایجو او شهادتنامو ریاست له لوري د فراغت تصدیق پاڼې برېښنایي شوې
د پوهنې وزارت د نتایجو او شهادتنامو ریاست په نوښت او د معلوماتي ټکنالوژۍ ریاست په مرسته د خدمتونو د چټکتیا په موخه د فراغت تصدیق پاڼې برېښنایي شوې.
په همدې مناسبت د پوهنې وزارت د نتایجو او شهادتنامو او معلوماتي ټکنالوژۍ ریاستونو د کارکوونکو په ګډون غونډه جوړه شوه.
په پیل کې د پوهنې وزارت د نتایجو او شهادتنامو رئیس مولوي صبغت الله وصیل د معلوماتي ټکنالوژۍ ریاست د مسئولینو له هڅو څخه د مننې ترڅنګ د پوهنې وزارت په کچه د تصدیق پاڼو برېښتایي کېدل یې یو نیک اقدام وباله.
نوموړي ټینګار وکړ؛ چې له دې وړاندې د تصدیق پاڼو د اخیستلو په جریان کې ډېرې ستونزې وې، غوښتونکي له ډېرو ننګونو سره مخامخ کېدل، جعل کاري به کېدله.
له نېکه مرغه، د دې سیسټم په جوړېدو سره به د هر ډول سرغړونو مخه ونیول شي، روڼتیا به رامنځ ته شي او د غوښتونکو ګڼه ګوڼه به راکمه شي.
یاده غونډه د دعائیې په لوستلو سره پای ته ورسېده.
