د پوهنې وزارت سرپرست د هلمند ولایت ښوونیز او روزنیز وضعیت له نږدې وڅاره
د پوهنې وزارت سرپرست الحاج مولوي حبيب الله آغا او ورسره مل پلاوی چې د هېواد په سوېلي ولايتونو کې د ښوونيز وضعیت په ارزونه او څارنه بوخت دی، نن د هلمند ولایت تعلیمي وضعیت وارزاوه.
په هغه کتنه کې چې نوموړي د دغه ولایت له پوهنې رئیس الحاج مولوي محمد عوض انصاري، مسئولینو، استادانو او علماوو سره درلوده، د یاد ولایت پوهنیز وضعیت په اړه بحثونه او تفصیلي خبرې وکړې.
د پوهنې وزارت سرپرست د دغه سفر په دوام د پوهنې له رئیس او مسئولینو سره په ګډه ګرشک، باباجي، کجکي، سنګین او موسی کلا ولسوالیو ته د سفر پرمهال، د یو شمېر مدارسو او ښوونځیو څخه لیدنه وکړه او د یادو ښوونیزو بنسټونو له مشرانو، مهتممینو او طالب العلمانو سره یې له نږدې خبرې وکړې.
د پوهنې وزارت سرپرست په ګرشک ولسوالۍ کې له حبیبیه دارالعلوم او مزمل مدرسې، موسی کلا ولسوالۍ کې د نسیمه اناثیه مدرسې، سنګین ولسوالۍ کې د حقانيه مدرسې، لوی کندهار اسلامیه شرعیه او یو باب دارالایتام، کجکي ولسوالۍ کې د مرحوم عالیقدر امیرالمؤمنین ملامحمدعمرمجاهد له جامعه الشهداء مدرسې، ابوحنیفه(رحمه الله) مدرسې او سفلی ښوونځي څخه لیدنه وکړه، استادان يې د هېواد بچیانو سالمې ښوونې او روزنې او زده کوونکي یې په خپلو درسونو کې کوښښ کولو ته وهڅول.
له بلې خوا د یادو ادارو مسئولینو د پوهنې وزارت مشرتابه ته ښه راغلاست ووایه او یو لړ ستونزې، وړاندیزونه او نظریات یې د پوهنې وزارت له سرپرست سره شریک کړل، چې د مشرتابه له لوري ورته د ستونزو په حل کې د بشپړې همکارۍ ډاډ ورکړل شو.
د دغو غونډو په پای کې د يادو مدارسو مهتممین او طالب العلمان د پوهنې وزارت د سرپرست له خوا په نغدي ډالیو وویاړل شول.
یو شمېر علماوو او د خلکو استازو هم د علم او پوهې پر ارزښت خبرې وکړې او په دې برخه کې یې د پوهنې وزارت د رهبرۍ له پاملرنې مننه وکړه.
