لوګر کې یوې دیني مدرسې ته ودانۍ جوړېږي

atayee
Mon, Apr 15 2019 11:10 AM
لوګر کې یوې دیني مدرسې ته ودانۍ جوړېږي

د لوګر ولایت ازرې ولسوالۍ د حضرت یحییٰ دیني مدرسې ته د ودانۍ جوړولو کار پیل شو. 
د مدرسې د ودانۍ پر جوړولو شاوخوا ۱۳ میلیونه افغانۍ لګښت راځي، چې د افغان حکومت د بودجې له لارې ورکول کېږي. 
یاده ودانۍ به ۸ درسي ټولګي،۲ اداري خونې، میز او څوکۍ، د اوبوڅاه، د احاطې دېوال او ۵ غرفې تشنابونه ولري، چې د جوړېدو چارې به یې په ۹ میاشتو کې بشپړ شي. 
د حضرت یحییٰ دیني مدرسه شپږ کاله وړاندې فعاله شوې، چې دا مهال ۸۰ زده کوونکي په کې په زده کړو بوخت دي. 
په لوګر کې دا مهال ۲۹ دیني مدرسې، دارالحفاظونه او دارالعلومونه فعالیت لري، چې ۲۵ یې لاهم ودانۍ نه لري. 
په یادو مدرسو، دارالحفاظونو او دارالعلومونو کې ۳۰۳۰ کسان زده کړې کوي،چې شاوخوا ۹۰۵ یې نجونې دي. 
د لوګر د پوهنې رئیس عبدالوکیل کلیوال وایي، چې په روان کال کې به یو شمېر نورو دیني مدرسو، دارالحفاظونو او دارالعلومونو ته هم ودانۍ جوړې کړي. 
دا په داسې حال کې ده،چې پرون شنبې هم د یادې ولسوالۍ د چوترې د هلکانو لېسې ته د ودانۍ جوړولو کار پیل شوی.