له ولایتونو څخه د پوهنې خبرونه
فراه
د فراه ولایت د ابوذر غفاري دارالعلوم او د مرکزي دارالایتام آمرینو او استادانو د دغه ولایت د پوهنې له رئیس مولوي اختر محمد زعیم سره وکتل او د خپلو ادارو ستونزې، اړتیاوې او وړاندیزونه یې ورسره شریک کړل.
لوګر
انجنیر محراب الدین احمدیار چې اوس مهال په کاناډا هېواد کې ژوند کوي د لوګر ولایت مرکز اړوند د سیدان منځني ښوونځي ۲۱۰ تنو زده کوونکو ته د ۱۲۴ زره افغانیو په ارزښت د جامو او ښوونیزو توکو مرسته وکړه.
کابل
د کابل ښار د پوهنې ریاست اداري غونډه د دغه ریاست د مسؤلینو، د تعلیمي حوزو او ښوونځیو د آمرینو په ګډون جوړه شوه.
په دې کاري غونډه کې د کابل ښار د پوهنې ریاست د نوي رئیس د معرفي کولو تر څنګ پر ځینو اړینو مسایلو هر اړخیز بحثونه وشول.
لغمان
د لغمان ولايت د پوهنې رئيس مولوي شاه جهان ساجد د دې ولايت د قرغيو ولسوالۍ د مياعمر، احسن العلوم له دارالعلمونو او د دې ولسوالۍ د معروف خېلو د ديني مدرسې له ښوونيزو فعاليتونو څخه څارنه وکړه او د يادو ديني بنسټونو له استادانو او زده کوونکو سره يې له نږدې وکتل.
لوګر
د لوګر د پوهنې ریاست مسؤلین وايي: د پوهنې وزارت د لارښوونې پر اساس یې د دغه ولایت د دولتي او خصوصي ښوونځیو د زده کوونکو د شمېر او احصاییې د چمتو کولو لړۍ پیل کړې ده.
د دوی په وینا دا بهیر د پلان مدیریت له خوا پیل شوی او ټاکل شوې چې په یوه میاشت کې پای ته ورسېږي.
