له ولایتونو څخه د پوهنې کړنو انعکاس
پکتیا
د پکتيا والي الحاج مهرالله حماد او د یاد ولايت پوهنې رئيس مولوي عبدالوکيل خالد د ګردېز ښار له مرکزي دارالاېتام څخه ليدنه وکړه او هلته يې له زده کوونکو سره خواخوږي او همدردي څرګنده کړه.
د غه راز هغوی د يتيمانو ستونزې وڅېړلې او د حل ژمنه يې وکړه.
غزني
د غزني ولايت پوهنې رئيس الحاج مولوي مير نصير احمد حسيني، د یاد ولایت ده يک ولسوالۍ له امنيې قوماندان، د استخباراتو رئیس او يو شمېر مسئولينو سره په کتنه کې، د يو شمېر ښوونځيو او دارالعلومونو درسي کړنې، ستونزې او پرمختګونه وارزول.
لغمان
د لغمان ولایت پوهنې رئیس مولوي شاه جهان ساجد، د یاد ریاست د انجنیرانو له ټېم سره، په مرکز او ولسوالیو کې د یو شمېر ښوونځیو بیارغونې چارې چې د یوه مرستندویه بنسټ په همکارۍ ترسره کېږي، وڅېړلې او د ساختماني توکو کارولو په لوړ کیفیت یې ټینګار وکړ.
سمنګان
د سمنګان ولایت پوهنې رئیس الحاج مولوي نصرت الله فیضاني، د پوهنې په برخه د یوه همکار بنسټ له رئیس سره وکتل.
د يادې مرستندویه بنسټ مسئول پوهنې په برخه کې د خپلو کړنو په اړه معلومات ورکړل او سمنګان ته يې د سفر موخه، د پوهنې د اوسني حالت ارزونه، د ستونزو معلومول او د کره شمېرو راټولول وبلل.
د پوهنې رئيس د یاد بنسټ له کړنو څخه خوښي څرګنده او ژمنه يې وکړه، چې د دوى د پوهنيزو پروګرامونو په پلي کولو کې به همکاري کوي.
د یو بل خبر له مخې:
د پوهنې په برخه کې یوې همکارې ادارې د سمنګان ولایت په خلم ولسوالۍ کې د هغوی تر ملاتړ لاندې د سیمه ییزو ټولګیو د کړنو په تړاو له پوهنې رئیس سره وکتل.
د پوهنې رئيس د يادې ادارې له همکارۍ څخه د مننې ترڅنګ ژمنه وکړه، چې يادې ادارې ته به لازمې آسانتياوې برابرې کړي.
