د ولایتونو پوهنې خبرونو ته لنډه کتنه
هرات
د پوهنې وزارت د پلان ریاست د کارپوهانو پلاوي، د یاد ولایت له پوهنې رئیس مولوي رحمت الله جابر سره په لیدنه کې دغه ولایت ته د خپل سفر موخه، د نویو ګمارل شویو کارکوونکو لپاره د وړتیاوو لوړونې د ورکشاپونو جوړول وبلل.
دهرات پوهنې رئیس یاد پلاوي ته د ښه راغلاست په ترڅ کې، د دغه ډول پروګرامونو هرکلى او ملاتړ وکړ .
کندهار
د کندهار ولايت پوهنې رياست هغه ممتاز زده کوونکي، چې د یاد ولايت د ښوونځيو او مدارسو زده کوونکو ترمنځ يې په علمي سياليو کې برخه اخستې وه؛ وستايل.
د پوهنې رئیس الحاج مولوي فخرالدين «نقشبندي» په زده کوونکو د ډالیو وېشلو په ترڅ کې له هغوى وغوښتل، تر څو د ديني او عصري علومو په زده کړه کې لازیاتې هلې ځلې وکړي.
ننګرهار
د ننګرهار پوهنې ریاست مسئولین وايي: په دې وروستیو کې له پاکستان څخه د راستانه شویو هغو کډوالو ماشومانو څخه کوم چې تر مختلفو ټولګیو یې زده کړې کړي دي، د سویې د تثبیت آزموینه واخیستل شوه.
په پام کې ده چې له ارزونې وروسته به زده کوونکي د هغوی له سویې سره سم ټولګیو ته ور وپېژندل شي.
بیا هم له یاد ولایت څخه:
د پوهنې په برخه کې د یو همکار بنسټ له لوري، د ننګرهار په کامه ولسوالۍ کې د مراد علي صاحبزاده د نجونو لېسې د پاکو اوبو یو څاه برابر کړ چې د دغې لېسې زده کوونکي او کارکوونکي د څښاک د پاکو اوبو له نعمت څخه برخمن شول.
د یادې ولسوالۍ د پوهنې آمریت د دغه همکار بنسټ له مرستې مننه او قدرداني وکړه.
دایکنډي
د دايکنډي ولايت پوهنې رئيس قاري عنايت الله سهار، د یاد ولايت د اطلاعاتو او فرهنګ له رئيس سيد محمد صالح سره وکتل.
دواړو لورو د پوهنې د بهير او پر هېواد د شوروي يرغلونو د وېجاړونکو اغېزو په باب تفصیلي خبرې او نظرونو تبادله کړل.
