د یونسیف مرستیالې میرمن حنان سلیمان د پوهنې وزارت له سرپرست وزیر سره وکتل
د یونسیف مرستیالې میرمن حنان سلیمان (HANNAN SULIEMAN) او ورسره مل هیئت یې چې په ترکیب کې یې د افغانستان لپاره د یونسیف مسئول محمد ایویا (MOHAMED AYOYA )، د یونسیف د بشري سرچینو رئیس بنډجیګو ماګاسا(BANDJOUGOU MAGASSA ) او د یونسیف د مرستیالې مشاوره میرمن ګیټا نجلي نارایان (GEETANJALI NARAYAN ) شامل وو، د پوهنې وزارت د مقام په دفتر کې د یاد وزارت له سرپرست وزیر شیخ مولوي نورالله منیر صاحب سره وکتل.
په یاده لیدنه کې د یونسیف مرستیالې میرمن حنان سلیمان د افغانستان د تعلیمي نظام د بشپړ ملاتړ لپاره خپله ژمنتیا بیا تکرار کړه. نوموړې د خپلو خبرو په ترڅ کې زیاته کړه، چې یونسیف دا مهال په افغانستان کې نږدې نهه زره(۹۰۰۰) سیمه ایز درسي (COMUNACATED BASE EDUCATION) ټولګي لري او د راتلونکي لپاره پلان لري، چې پنځه زره(۵۰۰۰) نور ټولګي هم جوړ کړي.
د پوهنې محترم وزیر صاحب د افغانستان په تعلیمي ډګر کې د یونسیف هلې ځلې وستایلې او څرګنده یې کړه، چې د یاد بنسټ ټول ښوونیز پروګرامونه په تیره بیا سیمه ایز درسي ټولګي (CBE) د تعلیمي خدماتو یوه غوره او اغیزناکه بڼه ده، چې د پوهنې وزارت د کمیت او کیفیت په لحاظ د یادو ټولګیو د لا پیاوړتیا لپاره له یونسیف سره په ګډه کار کوي.
