په مرکز او ولایتونو کې د پوهنې خبرونه

کابل:
د کابل ولايت د شکردرې ولسوالۍ د پوهنې رياست چارواکي وايي: د ستر پیغمبر (ص) د ميلاد په مناسبت د دې والسوالۍ په سیمه ایزو ښوونځيو کې د قرانکريم د ختم د مراسمو په ترڅ کې د حفظ الصحې توکي لکه ماسک، د مينځلو مايع او صابون ووېشل شول.
د دې ولايت له ګلدرې ولسوالۍ څخه هم خبر رارسېدلى، چې د دې ولسوالۍ د پوهنې آمر مولوي دانيال حنفي له خپل پلاوي سره د زده كوونكو او استادانو د حاضریو، د نصاب او كتابتون، لابراتوار او نورو اداري چارو په اړه جدي څارنه وکړه. د دې ولسوالۍ د یو شمېر ښوونځیو تدریسي ستونزې وڅېړل شوې، د ستونزو د حل په موخه یې لازمې لارښوونې وکړې.
ولایتونه:
د هېواد د پوهنې ریاستونو او ښوونځیو په ډېری مراسمو کې د اسلام د ستر پیغمبر د زوکړې ورځ ونمانځله.
ګډونوالو د ستر پیغمبر په سیرت، اخلاقو، چلند خبرې وکړې او له ټول مسلمه امت څخه یې وغوښتل چې په خپل ژوند کې د ستر پیغمبر سیرت د نمونې په توګه وټاکي او د هغه رښتیني پیروان شي.
بلخ:
د بلخ ولایت د دیني مدرسو ۵۱ تنه ښوونکي فارغ شول.
د دغه ولایت والي او د پوهنې رئیس د غونډې له ګډونوالو څخه د مننې او خوښۍ په ترڅ کې د قرآن عظیم الشان درس او حفظ د اسلام د سپېڅلي دین له مهمو عباداتو څخه وباله او له خلکو یې وغوښتل چې خپل کارونه د اسلام له احکامو سره سم ترسره کړي.
لوګر:
د لوګر ولایت په خروار ولسوالۍ کې قومي مشرانو او ځايي خلکو په خپل لګښت یو ښوونځی جوړ کړی چې په یوه وخت کې د ۴۰۰ زده کوونکو ظرفیت لري.
د دغه ولايت د پوهنې رئيس مولوي جنت ګل عزيز د قومي مخورو د دغه کړنې د ستاينې په ترڅ کې وويل: د خروار ولسوالۍ خلکو په خپل ځاى کې د علم څراغونه روښانه کړي، ترڅو خپل نوي نسل ته لاره ومومي او هوسا شي. "
همدارنګه له همدې ولایت څخه په یو بل خبر کې راغلي چې د برکي برک ولسوالۍ د ۲۲ بابه خصوصي مدرسو سره د پوهنې وزارت د اسلامي زده کړو ریاست له لورې نغدي مرسته وشوه.
کندز:
د پوهنې وزارت د څارنې او ارزونې بورډ د کندوز د پوهنې ریاست ټولې اداري او تدریسي چارې وڅارلې.
هرات:
مولوي عبدالجلیل مزمل، دعامې تعلیماتو آمر د هرات ولایت د پوهنې ریاست په مرکز کې د هلکانو او نجونو له عالي لېسو، د میرسادات د نجونو لېسې او د شینډنډ ولسوالۍ د واعظ کاشفي د هلکانو له لېسو څخه لیدنه وکړه.
خوست:
مولوي حفیظ الرحمن د خوست ولایت د پوهنې ریاست د تعلیمي نظارت د عمومي آمر په توګه معرفي او په کار یې پیل وکړ.
غزني:
د یونیسف او OCCD موسسې په پام کې لري چې د غزني ولایت په ځینو ولسوالیو کې د زده کړو ۴۰۰  سیمه ایز ټولګي جوړ کړي.
د غزني ولايت د پوهنې رئيس د يادو بنسټونو له مسوولينو څخه د مننې په څرګندولو سره وويل: د غزني ولايت د پوهنې رهبري په دغه ولايت کې د پوهنې د وضعيت د ښه والي په برخه کې د ټولو فعاليتونو هرکلی کوي او هر ډول مرستو ته چمتو دي.
لغمان:
د لغمان ولایت د پوهنې ریاست د تعلیمي نظارت غړو د دغه ولایت د قرغیو او علیشنګ ولسوالیو له ټولو ښوونځیو څخه څارنه وکړه او د شته نیمګړتیاوو او ستونزو په اړه یې اړوندو مسوولینو ته لازمې لارښوونې وکړې.
همدارنګه د دغه ولایت د پوهنې رئیس مولوي شاه جهان ساجد د نسوان کمین لېسې د زده کوونکو علمي کړنې مثبتې و ارزولې او د نظم، دسپلین، د اسلامي حجاب په مراعتولو او د یاد شوي جومات په پاکوالي یې ټینګار وکړ.
جوزجان:
د جوزجان د پوهنې رياست چارواکي وايي، چې يوه مياشت وړاندې يې د دغه ولايت د بدني روزنې ادارې په مرسته د دغه ولايت په مرکز شبرغان ښار کې د ښوونځيو د ١٨ فوټبال لوبډلو ترمنځ د فوټبال سيالۍ پيل کړې وې. د شبرغان د افغان ترک لېسې لوبډلې په بریا سره پاى ته ورسيده.
کابل:
د پوهنې وزارت د ساینس او ټکنالوژۍ د ښوونیز مرکز تدریسي مرستیال مولوي فضل الهادي د دغه ریاست د لابراتوارونو د علمي غړو او استادانو ارزونه وکړه، د دې ارزونې پایله یې مثبته وبلله او ارزوونکي یې وهڅول.