له ولایتونو څخه د پوهنې خبرونه

کندز:
د امام صاحب ولسوالۍ د پوهنې آمریت په انګړ کې د دفتري توکو د ثبت، د شته توکو د ثبت، د ګدامونو ، د سپارلو دوره،  د آمرینو  لپاره د حاضرۍ احصایوي جوړښت او نورو اداري کارونو د ښه پېژندلو په موخه یو ورځنی سیمینار جوړ شو.
لغمان
د لغمان ولايت د پوهنې ريس مولوي شاه جهان ساجد د دې رياست له ادارو او دفترونو څخه ليدنه وکړه او له کارکوونکو يې وغوښتل، چې حاضري او اداري اصولو ته پابند واوسي او له مراجعينو سره ښه چلند وکړي.
هرات:
 د هرات ولایت په هېواد خصوصي موسسه کې یوه ښوونیزه، علمي او کلتوري نندارتون د دې ولايت د پوهنې ریس مولوي شهاب الدين ثاقب او نورو مسوولينو په شتون کې پرانيستل شو.
د دغه ولايت د پوهنې ريس له نندارتون څخه د ليدنې پر مهال وویل، چې دغه ډول نندارتونونه  د زده کوونکو د استعدادونو د ودې او پياوړتيا لپاره ارزښتناک او خورا مهم دي.
نورستان:
د نورستان ولایت د نورګرام ولسوالۍ د پوهنې آمر سیدخلیل حیدري له راغلي پلاوي سره یو ځای د کلتن د نارینه او ښځینه منځنیو ښوونځیو له اداري او تدریسي څانګو څخه څارنه وکړه او د دغو ښوونځیو له مسوولینو څخه یې وغوښتل چې د دې ښوونځيو د ښوونیز نظام د پیاوړتیا لپاره زیاتې هڅې وکړي.
فاریاب:
NRC موسسې په فاریاب ولایت کې  د ستاره نومې نجونو ښوونځي لپاره د پوهنې په برخه کې له لومړي ټولګي څخه تر شپږم ټولګي پورې څوارلس سوه اته سوه توګه درسي کتابونه چمتو کړي دي.
د دغه ولايت د پوهنې رياست مسوولينو د ښوونې او روزنې په برخه کې د يادې شوې ادارې له مرستو مننه وکړه او د دا ډول مرستو د دوام غوښتنه يې وکړه.