د ولایتونو پوهنې خبرونو ته لنډه کتنه
بلخ
د بلخ ولایت د مرکزي دارالاېتام د درسونو د پیل مراسمو کې، د یاد ولایت پوهنې رئیس الحاج مولوي عبدالجلیل شهیدخېل او د دغه ولایت د مرکزي دارالاېتام مسئول مولوي علي ګل په خپلو خبرو کې، یتیمان د شهیدانو وارثین وبلل، چې د خپلو وینو په تویولو سره یې د هېواد آزادي تضمین کړې ده.
د بلخ ولایت پوهنې رئیس د یاد بنسټ له مسئولینو څخه غوښتنه وکړه، تر څو د یتیمانو په وړاندې په خپلو چلندونو او کړنو کې تل د زړه له کومي د شفقت او مهربانۍ څخه کار واخلي.
زابل
د زابل ولایت پوهنې رئیس الحاج مولوي ګل ولي متقي، د یاد ولایت د شیخ متي بابا لېسې له اداري او تدریسي چارو څخه څارنه وکړه او د ښوونیز وضعیت لاښه والي په موخه یې، مسئولینو ته لازمې لارښوونې وکړې.
کندوز
د کندوز ولایت پوهنې ریاست له ۲۵۹ تنه راستنېدونکو کډوالو څخه د سویې د تثبیت په موخه آزموینه واخیسته.
همدارنګه نوماندان به تر آزموینې وروسته د خپلو ښوونیزو سویو سره سم، د یاد ولايت د ښوونځيو په اتم، نهم او لسمو ټولګيو کې شامل شي.
پنجشېر
د پنجشېر ولايت د پوهنې رياست د آزموينو د مديريت کمېټې، له ۶۰ تنو نوماندانو څخه اداري او تدريسي رقابتي آزموينه واخيسته.
په پام کې ده، چې بریالي کسان به د یاد ولایت د رسمي مدارسو په اداري او تدریسي بستونو کې په دندو وګمارل شي.
