د پوهنې وزارت د دعوت او ارشاد ریاست د کړنو او لاسته راوړنو اوونیز راپور
تېره اوونۍ د پوهنې وزارت د دعوت او ارشاد ریاست مسئولینو د کابل ښار د پینځمې، شپږمې او دیارلسمې ښوونیزو ناحیو اړوند ناهید شهید، محمد اسماعیل حسنزي، سردار محمد داود خان، نازو انا، بي پي مهرو ا/امارتي ښوونځيو او پردیس، حدیقه الایمان، حکیم زاده، وفاق، کانوال، کلید معرفت خصوصي ښوونځیو او هلال سنټر، وفاق، پرورش ذهن او آموزګار تعلیمي کورسونو څخه لیدنې ترسره کړې.
د دغو لیدنو پر مهال د زدهکوونکو سیرت، صورت، نظم، ډسپلین او اخلاقي وضعیت په هر اړخیز وارزول شو او د ښوونیز چاپېریال لا ښهوالي په موخه لازمې لارښوونې او سپارښتنې وړاندې شوې.
همداراز، د تعلیمي بهیر د کیفیت لوړولو لپاره د تقویتي نصاب په ځینو برخو کې د اصلاح او تعدیل هدایات ورکړل شول، ترڅو د زدهکوونکو دیني، اخلاقي او فکري روزنه لا پیاوړې او د ښوونې او روزنې بهیر په اغېزمن ډول پر مخ ولاړ شي.
په ورته مهال، د یادو ښوونیزو مرکزونو لپاره د دعوت او ارشاد د فعالیتونو د منظم تطبیق په موخه مبلغان وټاکل شول، تر څو د دعوت او ارشاد د نصاب د تدریس چارې پر مخ یوسي او د زدهکوونکو تر منځ فکري، اخلاقي او اصلاحي بهیر لا پیاوړی شي.
سربېره پر دې، د دعوت او ارشاد ریاست مسوولینو لخوا، د پوهنې وزارت مرکزي هستې اړوندو کارکوونکو ته مهم شرعي مسایل تشرېح او اصلاحي بیانونه هم ترسره شول، چې موخه یې د ښوونیزو مرکزونو د منسوبینو او کارکوونکو دیني پوهې لوړول، د نصاب د ښه تطبیق تضمین او د اصلاحي فعالیتونو پیاوړتیا وه.
د پوهنې وزارت له ولایتي ریاستونو ترلاسه شوي معلومات ښيي، چې د دعوت او ارشاد مسئولینو په ټولو ولایتونو کې د نصاب د تدریس ترڅنګ اصلاحي بیانونه، دیني ارشادات او اصلاحاتي پروګرامونه په منظمه توګه تطبیق کړي، چې پایلې یې مثبتې ارزول شوې دي.
د یادو هڅو په پایله کې د کارکوونکو دیني پوهه پیاوړې شوې، د ښوونیز نصاب تطبیق اغېزمن شوی او د اصلاحي پروګرامونو د اغېزمنتیا څرګندې نښې لیدل کېږي.
