د غور ولایت ښوونځيو ته درسي توکې وویشل شول
د پوهنې وزارت، غور: د یونیسف موسسې په مالي مرسته د غور ولایت د ښوونځیو زده کونکو ته یو شمیر درسي توکې دپوهنې ریاست د اسلامي تعلیماتو آمر استاد میراحمد حسیني، د یونیسف موسسي مسوولینو او د ولسوالیو د پوهنې آمرینو په شتون کې وویشل شول.
د غور د پوهنې ریاست د اسلامي زده کړو آمر پوهاند میراحمد حسیني د درسي توکو د ویش پرمهال د یونیسف ادارې نه مننه وکړه او ژمنه یې وکړه چې دغه توکي به د ولسوالیو د پوهنې آمریتونو له لارې د دغه ولایت ټولو ښوونځیو ته وویشل شي.
ښاغلي حسیني زیاته کړه چې د درسي توکو ویش به د زده کړې پروسې په پیاوړي کولو کې اغیزمن وي او د ښوونځيو زده کونکي به زده کړو ته وهڅوي او ډیر ماشومان به د غور ولایت ښوونځیو ته جذب کړي.
په مرسته شویو درسي توکو کې خیمې، د زده کوونکو لپاره د درسي موادوکیټونه، د ښوونکو دلارښود کیټونه، بکسونه، روغتیایي کیټونه، فرشونه او سپورټي وسایل شامل دي چې د غور ولایت زده کونکو ته به وویشل شي.
د غور ولایت د ولسوالیو د پوهنې آمرینو د پوهنې وضعیت ښه کولو لپاره د درسي توکو د ویشلو له امله د یونیسف موسسې نه مننه وکړه او د دې ولایت په ښوونځیو کې د ماشومانو د شاملولو لپاره د ماشومانو هڅولو ته هم اشاره وکړه.
د یادونې وړ ده چې یونیسف موسسې د پوهنې ریاست سره په ګډه د ښوونې او روزنې وضعیت ښه کولو په موخه تل د دې ولایت له ښوونځیو او زده کونکو سره همکاري کړیده.
