د پوهنې وزارت د څېړنو نوی رئیس معرفي شو
د پوهنې وزارت د څېړنو نوی رئیس محترم الحاج مولوي عبدالحق حقاني د پوهنې وزارت د مقام د دفتر لوی رئیس محترم شیخ محمد طاووس طارق له خوا د یاد وزارت د مرکزي څانګو یو شمېر رئیسانو او کارکوونکو په حضور کې معرفي او په کار یې پیل وکړ.
لومړی، د پوهنې وزارت د مقام د دفتر محترم لوی رئیس په ادارو کې تقرر او بدلون یو اصل وګاڼه او ویې ویل چې دا ډول اقدامات په اداري څانګو کې د کارونو لا ښه والي لپاره پلي کېږي.
نوموړي زیاته کړه: په اسلامي نظام کې دندې یو مسئولیت دی او اسلامي نظام د الله تعالی له لوري یو نعمت دی چې زموږ مجاهد پرور ملت ته ورکړل شوی دی؛ نو اړینه ده چې موږ په دې برخه کې خپلې دندې په صادقانه او بشپړ اخلاص سره اداء کړو.
ورپسې د څېړنو رئیس هم د موضوع په اړه خبرې وکړې او د افغانستان .ا.ا. مشرتابه عالي مقام او د پوهنې وزارت د رهبرۍ له باور څخه یې د مننې ترڅنګ ډاډ ورکړ چې ورسپارل شوې دنده به په پوره صداقت او د پوهنې وزارت د محترم مشرتابه د لارښوونو او پرېکړو په رڼا کې پلې کړي.
غونډه د یاد وزارت د ښوونکو د مسلکي پراختیا د رئیس محترم مولوي محمد ابراهیم عمري له خوا دعائیې په لوستلو سره پای ته ورسېده.
