د پوهنې وزارت د کیفیت د تضمین معین الحاج مولوي عبدالخالق صادق د فراه ولایت ته سفر وکړ
د پوهنې وزارت د کیفیت د تضمین معین الحاج مولوي عبدالخالق صادق د فراه ولایت د تعلیمي وضعیت د ارزونې په تیره بیا د جهادي مدرسې او دارالایتام د چارو د څارنې په موخه یاد ولایت ته سفر وکړ.
هغه غونډه چې د معین صاحب د هرکلي په مناسبت جوړه شوې وه نوموړي پکې په خپله وینا کې د یادې مدرسې د مسئولینو او استادانو علمي خدمتونه وستایل، زده کوونکو ته یې سپارښتنه وکړه ترڅو په خپلو درسونو کې هڅاند واوسي، وخت ضایع نه کړي، د استادانو، والدینو او مشرانو درناوی وکړي، خپلو مسئولیتونو ته متوجه واوسي او ټولنې ته د سالمو شخصیتونو په توګه خدمت او کار وکړي.
په یاده لیدنه کې محترم معین صاحب د جهادي مدرسې او دارالایتام له مسئولینو، استادانو او زده کوونکو سره له نږدې ولیدل، د هغوی وړاندېزونه یې واورېدل، د تدریسي او اداري چارو، د زده کوونکو د علمي سویې، چاپېریال، غذایي رژیم، روغتیايي انتظام، ودانۍ، امنیت، د زده کوونکو د صورت او سیرت او نورو اړینو مسایلو ارزونه یې وکړه او مسئولینو ته یې لازمې سپارښتنې وکړې.
