له ولایتونو څخه د پوهنې اړوند څو خبرونو لنډیز 

بادغیس

د پوهنې وزارت د پلان ریاست د کارپوهانو یو پلاوی، د ۱۴۰۱ او ۱۴۰۲ لمریز کلونو د عملیاتي پلانونو د ارزونې په موخه، بادغیس ولایت ته ولاړ او د یاد ولایت پوهنې ریاست له مشرتابه سره یې د لیدنې پر مهال، د پرمختګونو، موخو، پلاونونو او ننګونو په تړاو تفصیلي خبرې وکړې.

دایکنډي

د پوهنې وزارت د کیفیت تضمین معینیت د دفتر آمر موسی کلیم وهاج، دایکنډي ولایت ته د یوه رسمي سفر په ترڅ کې، د یاد ولایت له پوهنې رئیس قاري عنایت الله سهار سره وکتل.
 د یاد پلاوي د سفر موخه، د کیفیت تضمین معینیت د آزموینې د ادارې د APEX پروګرام د ارزونې ټېم د فعالیتونو څارنه ده، چې څه موده وړاندې د پوهنې وزارت له لوري یاد ریاست ته استول شوی ؤ.

بیا هم له یاد ولایت څخه:

د دايکنډي ولايت يو شمېر ديني علماوو او مشرانو د یاد ولايت له پوهنې مشرتابه څخه مننه وکړه، چې د دوی اولادونو ته د ښوونيزو خدمتونو په وړاندې کولو کې زیاتې هلې ځلې کوي.
دغه راز د یاد ولایت مشرانو د پوهنې له رياست سره د هر ډول همکارۍ ژمنه وکړه.

لوګر

افغان ترک دارالعلوم، د لوګر ولایت له پوهنې ریاست سره په همغږۍ، په یاد ولایت کې د زده کوونکو لپاره د نوم لیکنې نوی بهیر پیل کړ.
د نوم لیکنې دغه بهیر به د روان لمریز کال د تلې میاشتې تر ۲۱ مې نېټې پورې دوام ولري.
یاد دارالعلوم چې د کابل ولايت په بګرامي ولسوالۍ کې موقعيت لري، د پوهنې وزارت د کړنلارې له مخې تر شپږم ټولګي پورې نارينه زده کوونکي جذبوي.

کاپیسا

د کاپیسا ولایت پوهنې ریاست کاري غونډه، د یاد ولایت پوهنې رئیس مولوي محمد فرید حقاني په مشرۍ، د سیمه ییزو ادارو او مرستندویه بنسټونو د مسئولینو په ګډون جوړه شوه.
ګډون والو د خپلو کړنو او راتلونکو پلانونو په اړه مشرتابه ته معلومات ورکړل.