په فارياب ولايت کې یو باب ښوونځی تاسیس شو
د فاریاب ولایت په اندخوی ولسوالۍ کې « د بي بي عایشه صدیقه رضی الله عنها » لومړنی ښوونځی نوی تاسیس او پرانیستل شو.
د یاد ښوونځي د پرانیستې په مراسمو کې د پوهنې رئيس الحاج مولوي سيد حفيظ الله معتصم بالله او د همدې ولسوالۍ د پوهنې يو شمېر مسئولينو، علماوو او د سيمې چارواکو هم ګډون کړى وو.
په پيل کې د یاد ولایت پوهنې رئیس په ټولنه کې د علم او پوهې پر اهمیت خبرې وکړې، په هېواد کې یې د ښوونیزو او روزنیزو آسانتیاوو رامنځته کول اړین وګڼل او په دې برخه کې د پوهنې وزارت له هلو ځلو څخه خلکو ته ډاډ ورکړ.
په ورته مهال علماوو او د سیمې مشرانو په ټول هېواد او په ځانګړې توګه اندخوی ولسوالۍ کې، د ښوونیزو بنسټونو د پراختیا او پرمختګ په تړاو د پوهنې وزارت د مشرتابه له پاملرنې څخه مننه او قدرداني وکړه.
