په ولایاتو کې د پوهنې خبرونه:

هرات:
د شینډنډ د پوهنې آمریت د شپاړسو ښوونځیو د زده کوونکو ترمنځ د سیرت المصطفی ص) تر عنوان لاندې د نبوي سنت د بیا ژوندي کولو سیالۍ ترسره شوې.
. د هرات ولايت د پوهنې رييس مولوي شهاب الدين ثاقب د دغه ډول سياليو د جوړولو د ستاينې په ترڅ کې له ګډونوالو وغوښتل چې په خپل ژوند کې د رسول الله (صلى الله عليه و اله و صحبه و سلم) اخلاق عملي کړي.
له همدې ولایت څخه په یوه بل خبر کې:
د توحید ښوونیزه خصوصي موسسه په دغه ولایت کې علمي، فرهنګي او ښوونیز نندارتون جوړ کړ. د هرات د پوهنې رياست د عمومي زده کړو آمر عبدالجليل مزمل د يادې ښوونيزې موسسې د ښوونکو د نوښت او د زده کوونکو د خلاقيت ستاينه وکړه او د دغو پروګرامونو پيل يې د زده کوونکو د ديني پوهې د غني کېدو لپاره مهم او ارزښتناک وباله.
لغمان:
د لغمان ولایت د پوهنې ریاست د دغه ولایت د الیشنګ او الینګار ولسوالیو د پوهنې کارکوونکو ته د احصایې او معلوماتو د ثبت او خپرولو په اړه روزنیز سیمینار جوړ کړ.
د دغه سیمینار د جوړیدو موخه د کارکوونکو د مسلکي مهارتونو د کچې لوړول دي.
▪ په یو بل خبر کې: د لغمان د ښاري څارنې بورډ د سلطان بابا منځني ښوونځي د ښوونکو د تدریسي بهیر څخه څارنه وکړه او د تدریسي نیمګړتیاوو په اړه یې ورته لازمې لارښوونې وکړې.
سمنګان:
د اغاخان د ښوونې او روزنې مسوولینو د سمنګان ولایت د پوهنې له رئیس مولوي نصرت الله فیضاني سره وکتل او ژمنه یې وکړه چې د سیمه ییزو ښوونیزو ټولګیو په جوړولو، ظرفیت لوړولو او د کانکور ازموینو ته د چمتووالي په برخه کې به د دغه ولایت له پوهنې سره مرسته وکړي. د سمنګان ولايت د پوهنې رئيس د پوهنې په برخه کې د آغاخان د دفتر له مرستو څخه خوښي څرګنده کړه.
کندز:
د پوهنې له سکتور څخه د ملاتړ په موخه د همغږۍ غونډه د کندز ولایت د پوهنې رئیس مولوي محمد اسماعیل ابو محمد په مشرۍ جوړه شوه.
د دې غونډې اجنډا د ښوونځیو جوړول، د میزونو او څوکیو برابرول، د ښوونکو او د پوهنې د کارکوونکو امنیت او روغتیايي مسایل شامل وو.
دکندز دپوهنې مسوولينو دپوهنې په برخه کې دهمکاريو او ادارو له مرستو څخه مننه او قدرداني وکړه .
په بله کاري ورځ کې:
دکندز ولايت د پوهنې رئيس له مرستندویو موسسو څخه مننه وکړه او خپلو مامورينو څخه یې وغوښتل، ترڅو د خپلو ورځنيو دندو په اجرا کولو کې اداري اصول مراعات کړي او له مراجعينو سره په چلند کې ښه چلند له پامه ونه غورځوي.
پنجشیر:
 د پنجشېر ولایت د عنابې ولسوالۍ د پوهنې د څارنې مسلکي غړو د دې ولسوالۍ د قلعچه منځني ښوونځي د ښوونکو تدریسي بهیر او د یادې ښوونځي اداري اسنادونه یې وڅېړل او د زده کوونکو د هڅونې ترڅنګ یې د یادې لېسې مسوولینو ته هم لازمې لارښوونې وکړې.