پکتیکا ولایت کې د ۲۰ مېلیونه افغانیو په لګښت د یوې دینې مدرسې بنسټ ډبره کېښودل شوه
د پکتیکا ولایت برمل ولسوالۍ د نخل دیني مدرسې د ودانۍ بنسټ ډبره د ۲۰ مېلیونه افغانیو په لګښت د یوې غونډې په ترڅ کې کېښودل شوه.
یاد مراسم د پکتیکا د مرستیال والي محترم مولوي مخدوم عبدالسلام سعادت په مشرۍ ترسره شول او د پوهنې، کلیو پراختیا، سرحدونو او قبایلو چارو رئیسانو، د برمل ولسوالۍ چارواکو، دیني علماءکرامو، قومي مشرانو، ښوونکو، ځوانانو او د ځایي خلکو استازو پکې ګډون درلود.
د یاد ولایت مرستیال والي وویل چې دغه مدرسه به د سیمې د دیني او علمي اړتیاوو په پوره کولو کې مهم رول ولوبوي او په پایله کې به یې د زرګونو ځوانانو لپاره د زدهکړې خوندي فرصت برابر شي.
د پوهنې رئیس محترم مولوي عبدالوکیل خالد هم ټینګار وکړ چې د دې مدرسې جوړول نه یوازې د برمل ولسوالۍ لپاره، بلکې د ټول پکتیکا ولایت لپاره یو مهم علمي او دیني پرمختګ دی.
د یادونې وړ ده چې همدغه مدرسه به په ۱۱ جرېبه ځمکه کې جوړه شي او یو لوی جومات، دارالحدیث، دارالحفاظ، تدریسي بلاکونه، د طلابو لپاره لیلیه او د استادانو لپاره اړینې خونې به پکې شاملې وي.
په دې وروستیو کې، د یادې ولسوالۍ یو شمېر علماءکرامو او اوسېدونکو د خپلو ماشومانو تعلیم ته د پوهنې وزارت د مشرتابه له پاملرنې څخه خوښي څرګنده او د وزارت د پروګرامونو د پلي کولو لپاره یې خپل ملاتړ اعلان کړ.
