د فاریاب او بلخ له پوهنې ریاست څخه خبرونه
د پوهنې وزارت د تشکیلاتو رئیس مفتي عبدالحلیم حلیمي له یوه پلاوي سره فاریاب ولایت ته ولاړ او د دغه ریاست د رئیس او کارکوونکو په حضور کې د دغه ریاست د ډیټابیس سیستم جوړ او پرانیست.
د مسوولینو په وینا: د یاد سیستم له رامنځته کېدو څخه یې موخه د پوهنې ریاست د کارکوونکو د تشکیل، ثبت او راجستر کولو لپاره د یوه مفصل ډیټابیس ترتیب، د انلاین نوم لیکنې اسانتیا او د کارکوونکو لپاره د پېژندپاڼو ترتیب او وېش ښودل شوی.
د خواجه سبزپوش ولسوالۍ د محمد ابراهیم عتیقي مدرسې د بیارغاونې چارې او همدارنګه د دغه ولایت د دولت آباد ولسوالۍ د چهارشنغو د لومړني ښوونځي د بیارغاونې چارې د پوهنې وزارت د تشکیلاتو د رئیس مفتي عبدالحلیم حلیمي او د یاد ولایت د پوهنې رئیس مولوي سید حفیظ الله معتصم بالله او یو شمېر مخورو کسانو په حضور کې په رسمي ډول پرانیستل شوې.
ویل کېږي چې د دغې پروژې مالي لګښت د ناروې هېواد له خوا او د جوړولو چارې یې د اکتید موسسې له لوري ترسره کېږي.
بلخ
محمد ظاهر آشکار د بلخ پوهنې ریاست د معلوماتي ټکنالوژۍ د عمومي مدیر په توګه وټاکل شو او د دغه ولایت د پوهنې رئیس الحاج مولوي عبدالجلیل شهیدخېل له خوا د یادې څانګې کارکوونکو ته ور وپېژندل شو.
د سید هاشم هاشمي لومړنی ښوونځی د بلخ ولایت په نهرشاهي ولسوالۍ کې جوړ او د څلورو انتقالي بستونو په ګډون د یوه ښوونکي په مقررولو سره رسماً خپل فعالیت پیل کړ.
د مارمل ولسوالۍ د پوهنې آمر مولوي حبیب الله حمیدي د مصعب ابن عمیر مدرسې، د ابو عصمت بلخي د نجونو او د ملا عبدالقادر اخند د لومړنیو ښوونځیو د تدریسي بهیر څارنه وکړه او د یادو بنسټونو ښوونکو ته یې لازمې لارښوونې وکړې.
