د پوهنې وزارت د زده کوونکو د چارو ریاست نوی رئیس دخپل ریاست کارمندانو ته ور وپېژندل شو
د پوهنې وزارت د زده کوونکو د چارو(امور متعلمین) نوی رئیس استاد حبیب الله خالد د یاد وزارت د اسنادو، احکامو او هدایاتو د تعقیب ریاست د رئیس مفتي شفیع الله منصور له لوري د یاد ریاست کارمندانو ته ور وپېژندل شو.
هغه مراسم چې په همدې مناسبت د ساینس د مرکز د غونډو په تالار کې جوړ شوي وو، مفتي شفیع الله منصور پکې د خپلې وینا په ترڅ کې د استاد حبیب الله خالد د تیرو جهادي او علمي خدماتو ستاینه وکړه، دزده کوونکو د چارو نوی ایجاد شوی ریاست یې یو مهم او کلیدي ارګان او استاد خالد یې د یاد ریاست د چارو د سنبالولو لپاره یو وړ شخص وباله.
ورپسې استاد حبیب الله خالد وینا وکړه ، نوموړي په خپله وینا کې د پوهنې وزارت د مشرتابه له اعتماد څخه مننه وکړه او ژمنه یې وکړه چې د خپل کاري ټیم په ملتیا به په خپل ټول توان سره د یاد ریاست د کارونو د تنظیم، سمون او پرمختګ لپاره زیار باسي.
د یادونې وړ ده، چې استاد حبیب الله خالد د ننګرهار پوهنتون د ادبیاتو له پوهنځي څخه فارغ شویدی، د کابل تر فتحې وړاندې یې د ښوونې او روزنې کمېسیون د عصري تعلیماتو د څانګې دمرستیال او د کابل تر فتحې وروسته یې د یو کال لپاره د پوهنې وزارت د خدماتو ریاست د رئیس په توګه دنده اجراء کړېده.
