له ولایتونو څخه د پوهنې لنډ خبرونه
نیمروز
د پوهنې وزارت د روغتیایي څانګې مسوولینو د دغه ولایت د پوهنې ریاست د مشرتابه پلاوي په حضور کې د نیمروز ولایت د ولسوالیو د پوهنې مسوولینو ته د حفظ الصحې او په ښوونځیو کې د لاس مینځلو د اسانتیاوو د برابرولو په باب روزنیز پروګرام جوړ کړ.
په دغه پروګرام کې د اسلام د سپېڅلي دين له نظره د پاکوالي پر ارزښت ټينګار وشو او له ګډونوالو وغوښتل شول چې د سیمینار له محتوا څخه په خپلو ورځنیو چارو کې ګټه پورته کړي.
فراه
د فراه ولایت د پوهنې ریاست د سواد زده کړې د ټولګیو داوطلب ښوونکي د یوې غونډې په ترڅ کې د ستاینلیکونو په ورکولو سره وستایل شول او هغوی د ټولنې رښتیني خدمتګاران وبلل شول.
کاپیسا
د کاپیسا ولایت د پوهنې ریاست د ساینس او تعلیمي ټکنالوژۍ د مدیریت لخوا د نجراب ولسوالۍ د ښوونځیو ۴۱ تنو ښوونکو ته د ساینسي مضامینو شپږ ورځنی روزنیز ورکشاپ جوړ شو.
دایکندي
په دې وروستیو کې حافظ انجینر صدیق الله ژمن د دایکنډي ولایت د پوهنې ریاست د مالي او اداري آمر په توګه په دریم بست کې معرفي شو. د دغه ولایت د پوهنې رئیس مفتي رحمت الله مدثر د ښوونې او روزنې او د اداري کارونو او خدمتونو د روڼتیا په برخه کې د نوي مالي او اداري آمر ګمارنه ګټوره وبلله او په دې برخه کې یې پر رښتینو هڅو ټینګار وکړ.
سرپل
د پوهنې وزارت د دوو ماسټر روزونکو له خوا د سرپل ولایت د پوهنې ریاست د ساینسي مدیریت او تعلیمي ټکنالوژۍ د علمي غړو او د ښوونکو د روزنې د استادانو لپاره شپږ ورځنی سیمینار جوړ شو.
د دغه ولایت د پوهنې رئیس مولوي محمد رحماني د دغه سیمینار له بهیر څخه لیدنه وکړه او له ګډونوالو یې وغوښتل، چې له شته فرصتونو څخه ښه ګټه پورته کړي.
