په مرکز او ولایتونو کې د پوهنې د فعالیتونو یوه برخه

لوګر:
د لوګر ولایت د مرکزي جهادي لېسې د څلور نیم میاشتنۍ ازموینې پایلې اعلان شوې.
په هغه غونډه کې چې په همدې مناسبت په ياده لېسه کې جوړه شوې وه، د پوهنې رياست مسوولينو، د لوګر ولايت چارواکو، ديني عالمانو او د سيمې خلکو برخه اخيستې وه.
بلخ:
 د عبدالجلیل زوی سیف الرحمن په نوم د بلخ ولایت د مارمل ولسوالۍ د ابو عصمت عالي لېسې د اتم ټولګي یو تن زده کوونکي د ترانسپورت وسایل جوړ کړي، چې د دغه ولایت د پوهنې ریاست د مشرتابه له خوا یې ستاینه وشوه او ژمنه یې وکړه. له هغه سره به مرسته وکړي.
پروان :
د پروان ولايت د پوهنې رئيس مفتي محمد حسن د بي بي حفصې د نجونو په لېسه کې د رسول الله (ص) د زوکړې په مناسبت جوړه شوې غونډه کې ګډون وکړ او د حضرت محمد (ص) پر اخلاقو يې خبرې وکړې. او زياته يې کړه چې مسلمانان بايد د رسول الله (ص) له سنتو څخه پيروي وکړي.

کابل:
 د کابل ولايت د بګرامي ولسوالۍ د پوهنې رئيس مولوي بلال حنفي د شمس العلوم روحاني لېسې د څلور نيمو مياشتنيو ازموينو څخه ليدنه وکړه، چې د ځينو ستونزو له امله ناوخته پيل شوې وه.
په ورته وخت کې د دغه ولایت له چهاراسیاب ولسوالۍ څخه په خپره شوې خبرپاڼه کې راغلي، چې د دې ولسوالۍ د پوهنې ریاست اداري غونډه د چهاراسیاب ولسوالۍ د ولسوال، عمیر المعروف او د پوهنې د مسؤلینو په ګډون جوړه شوه. او د لارښوونې او بلنې ریاست د تشکیل په ګډون په بیلابیلو موضوعاتو بحث وشو.
کاپیسا:
د کاپیسا ولایت د پوهنې رئیس مولوي محمد فرید حقاني د تګاب ولایت د امیرزاده خصوصي لېسې له تدریسي او اداري چارو څخه څارنه وکړه، زده کوونکي یې وهڅول او په لازمو مواردو کې یې ورته لارښوونې وکړې.
کابل:
د کابل ولايت د کلکان ولسوالۍ د پوهنې آمر محبوب الرحمن رحماني د اغا سراي د کلي په شورا کې مشورتي غونډه وکړه او له خلکو يې وغوښتل چې د خپل ښوونځي د مديريت په برخه کې همکاري وکړي او په کلي کې د یوه ښوونځي په جوړولو کې اقدام وکړي.

خوست:
دخوست ولايت د پوهنې رياست د خدماتو مديريت مسوولينو د يو عمومي اشر په ترڅ کې د دغه رياست ټولې ساحې له کثافاتو او بې کاره وسايلو څخه پاکې کړې .
د دې ادارې کارکوونکو ژمنه وکړه چې له اجیرانو سره به په ګډه د خپلو دفترونو په پاکولو کې فعاله ونډه اخلي.
نورستان:
د نورستان ولایت د کامدیش ولسوالۍ د پوهنې آمر مولوي مجیب الرحمن ثوبان د کماریګل، ارمورو او ساریت ښوونځیو له ټولو چارو څخه څارنه وکړه او د چارو د لا ښه والي په موخه یې لازمې لارښوونې وکړې.
بلخ:
د بلخ ولايت د پوهنې رياست د اسلامي زده کړو مرستيال مولوي عبدالصبور فريد له خپل ملگري پلاوي سره د ۱۴۰۰ کانکور د ازموينې په لومړۍ ورځ د بايومټريک له جریان څخه ليدنه وکړه او د دغه بهير د شفافو پړاوونو او د نظم د مراعتولو په اړه يې لارښوونې وکړې.
کابل:
د کابل ښار د پوهنې ریاست له کارکوونکو ستاینه وشوه.
د ښار د پوهنې رئیس مولوي احسان الله خطیب د ستاینلیک په ورکولو سره ټول مامورین صداقت او دیندارۍ ته وهڅول او د دوی د کارونو له امله یې ستاینه وکړه.