لغمان کې د چهاردهي ښوونځي نوې ودانۍ پرانېستل شوه
د پوهنې وزارت، لغمان: د لغمان ولایت مرکز پورې اړوند د چهاردهي د هلکانو منځني ښوونځي ودانۍ د یاد ولایت د والي مرستیال ډاکټر خواجه محمدعصامي، د پوهنې رئیس عبدالله حمیدي ، قومي مشرانو او ځوانانو په ګډون سره پرانيستل شوه.
د لغمان ولایت د پوهنې رئیس عبدالله حمیدي په وینا یاده ودانۍ د ۵ جریبه ځمکې په ساحه کې په پاخه او اساسي ډول د ٤١١٤٥٧٧٧ افغانیو په مجموعي لګښت د پوهنې وزارت له پراختیایی بوديجې څخه د دوو کلونو په موده کې جوړه شوې، چې ۳۰ درسي تولګي، ۷ اداري خونې، ۲۴ عصري تشنابونه، یوه حلقه د اوبو څاه، د احاطې دیوال، ۷۶۰ جوړې میزونه او چوکۍ او نورې ښوونیزې آسانتياوې لري، چې له جوړېدو او پرانېستو سره یې شاوخوا ۱۴۰۰ زده کوونکو ته د زده کړو خوندي درسي چاپېریال برابر شو.
همدارنګه د والي مرستيال د چهاردهي منځني ښوونځي د نوې ودانۍ د پرانېستو له امله ښوونکو، زده کوونکو او د سیمې اوسېدونکو ته مبارکي وویله او د سيمې له مشرانو یې وغوښتل، چې د ښوونځي نوې ودانۍ ساتلو ته جدي پاملرنه وکړي.
