پکتیا کې د دوو ښوونځیو ودانۍ ګټې اخیستنې ته وسپارل شوې
پوهنې وزارت، پکتیا: د پوهنې اونۍ په لړ کې پکتیا ولایت کې هم د (۴۱) مېلیونه افغانیو په ارزښت دوو ښوونځیو ته ودانۍ جوړې او ګټې اخستنې ته وسپارل شوې.
په دې مراسمو کې په انلاين ډول د هيواد ولسمشر جلالتماب محمد اشرف غني٫ د پکتیا ولایت مرستیال والي عبدالولي سهي، ښار جوړولو او ځمکو ریاست رئیس انجینر محمد رحیم افغان، د پکتیا پوهنې رئیس استاد کوچي ځاځي او د ولايتي شورا پخواني رئيس ډاکټر الله مير بهرام زوی ګډون درلود.
له یادو ښوونځيو څخه یو یې د (۱۶) مېلیونه افغانیو په ارزښت د جانېخېلو ولسوالۍ اړوند بلخېلو ښوونځی، او بل یې د (۲۵) مېلیونه افغانیو په ارزښت په ځاځي اریوب ولسوالۍ کې د هاشم خېلو ښوونځی دی، چې د ښار جوړولو او ځمکو وزارت له لوري په اساسي ډول رغول شوي دي.
د ښوونځیو د پرانېستې پر مهال، مرستیال عبدالولي سهي وویل: د نېکمرغۍ ځای دی، چې موږ د بلخېلو او هاشم خېلو غرنیو سېمو لپاره نن په اساسي او معیاري ډول ښوونځي جوړو او دا هغه څه دي، چې موږ ټولو ته د روښانه راتلونکي زېری را کوي.
د پکتیا ولایت پوهنې رئیس استاد کوچي ځاځي یادو ښوونځیو ته د ودانیو پر جوړېدو خوښي وښوده زیاته یې کړه : یادې سېمې ډېرې غرنۍ او لیرې پرتې سیمې دي، کله چې موږ خپلې چوپړتیاوې تر غرونو رسوو، نو دا کار زموږ او د ولس ترمینځ واټن را کموي او په دې توګه موږ کولای شو، چې د وخت په تیریدو سره په لیرې پرتو سېمو کې د بېسوادۍ کچه تر ډیره بریده راټیټه کړو.
