لوګر ولایت کې یوه لومړني ښوونځي ته ودانۍ جوړه شوه
پوهنې وزارت، لوګر: د لوګر ولایت په برکي برک ولسوالۍ کې د دشت دلاور لومړني ښوونځي ودانۍ ګټې اخیستنې ته وسپارل شوه.
د ياد ښوونځي پرانیستغونډه کې د پوهنې رياست استازو، دیني عالمانو، قومي مشرانو او زده کوونکو برخه اخېستې وه.
دغه ښوونځی، د اقراء پروژې له لارې د ۶،۴ میلیونه افغانیو په لګښت جوړ شوی، چې ۸ ټولګي، ۲ اداري خونې، د اوبو څاه، د لمريزې برېښنا واټر پمپ او پينځه غرفې تشنابونه لري چې د یادې ودانۍ په پرانیستلو سره، شاه وخوا ۴۰۰ زده کوونکو ته خوندي ښوونیز چاپیریال برابر شو.
د لوګر ولايت پوهنې رئیس سید عزیز احمد هاشمي د نوموړي ښوونځي پر جوړېدو خوښي وښوده او له خلکو یې وغوښتل چې د ښوونځي ساتنې ته پاملرنه وکړي.
هیره دې نه وي، چې لوګر ولایت کې له دې وړاندې هم د اقراء پروګرام له لارې څلور څلوېښت ښوونځيو ته ودانۍ جوړې او ګټې اخیستنې ته سپارل شوې دي.
