د میرمنو د آسیایي پوهنتون رئیس د پوهنې وزارت له سرپرست وزیر سره وکتل
د میرمنو د آسیايي پوهنتون ( Asian University For Women) رئیس پروفیسور کمال احمد د پوهنې وزارت له سرپرست وزیر محترم شیخ مولوي نورالله منیر سره وکتل .
په یاده لیدنه کې ښاغلي پروفیسور کمال احمد وویل، چې د دوی پوهنتون غواړي چې افغان زده کوونکو ته تعلیمي سکالرشیپونه ورکړي او هم ورته د انلاین زده کړو زمینه برابره کړي.
د پوهنې محترم وزیر صاحب د خپلو خبرو په ترڅ کې لومړی پروفیسور کمال احمد ته ښه راغلاست ووایه او بیا یې افغان زده کوونکو ته د یاد پوهنتون له لوري د تعلیمي او تحصیلي فرصتونو د برابرولو له امله له نوموړي څخه مننه وکړه.
د ملاقات په ترڅ کې هوکړه وشوه، چې د دواړو لوریو(د پوهنې وزارت- د میرمنو آسیايي پوهنتون) تخنیکي ټیمونه به د پورتنیو یاد شویو وړاندیزونو د تطبیق لپاره د یو میکانیزم په جوړولو کار پیلوي او بیا به د همدې مېکانیزم په اساس یاده پروسه عملا پیل کېږي.
