له ولایتونو څخه د پوهنې لنډ خبرونه
لغمان
د لغمان ولایت د پوهنې رئیس مولوي شاه جهان ساجد په دغه ولایت کې د پوهنې د ودې په موخه په جوړه شوې غونډه کې د اسلامي امارت له بریا وروسته د پوهنې په برخه کې د ترسره شویو فعالیتونو او پرمختګونو په اړه خوشبیني څرګنده کړه او له ګډونوالو یې وغوښتل چې د د ښوونې او روزنې په برخه کې شپه او ورځ کار وکړئ، ترڅو د پوهنې په برخه کې له نورو سره سیال شو.
د نورو خبرونو له مخې
د لغمان ولایت د مهترلام ښار د لسمې ناحیې مشرانو او اوسېدونکو د دغه ولایت د پوهنې له رئیس مولوي شاه جهان ساجد سره په لیدنه کې له هغه څخه وغوښتل، ترڅو د دوی په سیمه کې یو منځنی ښوونځی او څو د سیمه ییزو او ګړندۍ زده کړو ټولګي جوړ کړي.
د لغمان د پوهنې رئیس د مخورو قومونو له احساس څخه د هرکلي پرمهال ژمنه وکړه، چې د دوی غوښتنې به ژر تر ژره پوره کړي.
هرات
د هرات له دارالعلوم څخه د نبوي احادیثو د حنفي فقهې له تخصصي دروې او همدارنګه د قرانکریم د حسن قرائت په برخه کې د ۸۴ تنو فاضلانو د فراغت مراسم د هرات د دارالعلوم په انګړ کې د دغه ولایت د پوهنې رئیس مولوي عبدالله امیني، دیني عالمانو،مخورو سپین ږیرو او د فاضلانو د والدینو په حضور کې ترسره شول.
د پوهنې رئیس فارغانو ته د فراغت مبارکي وویله او له هغوی یې وغوښتل، ترڅو د دیني علومو د زده کړې ترڅنګ عصري علوم هم ترلاسه کړي.
کندهار
د کندهار ولايت د خاکريز ولسوالۍ د پوهنې آمر مولوي عبدالحنان فيضاني او ورسره پلاوي د يادې ولسوالۍ د احمديه، عشره مبشره او سعديه دارالعلومونو اداري او تدریسي اسنادونه وڅېړلې، د يادې ولسوالۍ له علماوو او قومي مخورو سره یې د ښوونې او روزنې د بهیر د ښه والي په باب خبرې وکړې.
له دې ولایت څخه په یو بل خبر کې
OCCD موسسې د خاکریز د پوهنې آمریت په مرسته د سیمه ییزو ښوونیزو ټولګیو د زده کوونکو د زده کړې په موخه ۲۴ خیمې جوړې او د ولسوالۍ آمریت ته یې سپارلي دي
پروان
د اسيا د ټولني د پرمختيا موسسې سیمه ییز دفتر د سواد زده کړي په برخه کي د پروان ولايت د نويو ګمارل شويو ښوونکو لپاره روزنيز سيمينار جوړ کړ.
د دغه ولایت د پوهنې رئیس مفتي محمد حسن حقاني د دغه سیمینار له تنظیموونکو څخه د مننې ترڅنګ له ګډونوالو وغوښتل چې د دغه سیمینار له محتوا څخه پوره پوره ګټه پورته کړي.
