د پوهنې وزارت خبرتیا
د ۱۳۹۹ لمریز کال د وري میاشتې ترپایه ټول ښوونیز مرکزونه وځنډیدل.
پوهنې وزارت_کابل: د پوهنې، عامې روغتیا، لوړو زده کړو، اطلاعات او کلتور وزارتونو او د تخنیکي او مسلکي زده کړو ادارې د ګډې غونډې پریکړې پراساس، په ګرمو او سړو سیمو لرونکو ولایتونو کې د پوهنې کورنی روغتیا ته د پاملرنې او د کرونا ویروس د خپریدو د مخنیوي په موخه ټول دولتي او مسلکي ښوونیز مرکزونه (ښوونځي، مدرسې، دارالعلومونه، دارالحفاظونه، د ښوونکي روزنې مرکزونه، د سواد زده کړې کورسونه، د حیاتي سواد ښوونځي او کورسونه) د ۱۳۹۹ لمریز کال د وري میاشتې ۳۰مې نیټې پورې وځنډول شول او د هیواد څخه بهر ښوونځي د یادو هیوادونو د شرایطو تابع دي.
پوهنې وزارت د یوې میاشتې رخصتیو له امله د درسي نصاب د پلي کولو او د ځنډیدل شوې دورې د جبران په موخه، د یاد وزارت د لوړ پوړو اداري کارکوونکو سره یوځاي تخنیکي کمیټه جوړه کړې ترڅو په ځنډیدل شویو ورځو کې د ښوونیزو خدمتونو وړاندې کولو د بدیل په میکانیزم کار وکړي.
دا کمیټه د پوهنې وزیر په مشرتابه هره ورځ هیوادوالو ته د پوهاوي ورکړې، او په یاده اداره کې د کاري چاپیریال خوندي کولو لپاره د لارښوود او میکانیزم په جوړولو او د کرونا ویروس د خپریدو او مخنیوي په برخه کې د عملي کړنو په موخه منظمې غونډې ترسره کوي چې د پریکړو پایلې به د اړتیا په وخت کې د افغانستان له خلکو او رسنیو سره شریکې کړل شي.
د پوهنې وزارت راتلونکي ګامونه به د تخنیکي کمیټې د پریکړو په رڼا او د وخت د اړتیا په صورت کې ونیول شي.
له بل لوري په پام کې ده چې راتلونکې اونۍ د ولایتونو پوهنې ریاستونو د بدني روزنې او روغتیا مدیرانو لپاره د کرونا ویروس د خپریدو او مخنیوي لارو چارو په موخه د عامې روغتیا په همکاری د پوهاوي یو ورځنۍ سمینار جوړ او ترسره شي.
وړاندې له دې نه د ګرمسیرو ولایتونو په ښوونځيو کې یو درسي ساعت د کرونا ویروس د خپریدو او مخنيوي لارو چارو په اړه د پوهاوي ورکړې لپاره ځانکړی شوۍ وو.
د یادونې وړ ده چې د لیاقت، سویې، مشروطي او معذرتي آزموینې به د عامې روغتیا د روغتیایي سپارښتنو سره سم د پخوا په څير واخیستل شي او د آزموینې اخیستلو پر وخت به وقایوي تدبیرونه ونیول شي.
د ښوونیزو مرکزونو ښوونکي به په اونۍ کې یوځل د حاضري د لاسلیک لپاره ښوونځي ته ځي.
