د پوهنې وزارت د ښوونې او روزنې معین د هلمند ولایت له جهادي مدرسې او مرکزي دارالایتامونو څخه لیدنه وکړه
د پوهنې وزارت د ښوونې او روزنې معین الحاج مولوي سخاءالله سعید او ورسره مل هیئت د عالیقدر امیرالمؤمنین د شفاهي حکم او د پوهنې وزارت د مقام د سپارښتنې په اساس، د هلمند ولایت له جهادي مدرسې او مرکزي دارالایتامونو څخه لیدنه وکړه.
په یاده لیدنه کې محترم معین صاحب د جهادي مدرسې او دارالایتامونو له مسئولینو، استادانو او زده کوونکو سره له نږدې ولیدل او د هغوی وړاندېزونه یې واورېدل.
معین صاحب په جهادي مدرسه کې په یوه شانداره غونډه کې چې د نوموړي د هرکلي په مناسبت جوړه شوې وه، ارزښتناکې خبرې وکړې، د مدرسې او دارالایتامونو د مسئولینو او استادانو علمي خدمات یې وستایل او زده کوونکي یې وهڅول ترڅو خپلو زده کړو او مسئولیتونو ته متوجه واوسي.
تر غونډې وروسته معین صاحب د یادې مدرسې د تدریسي او اداري چارو، د زدکوونکو د علمي سویې، د مدرسې د چاپېریال، غذایي رژیم، روغتیايي انتظام، ودانۍ، امنیت، د زده کوونکو د صورت او سیرت او نورو اړینو مسایلو ارزونه وکړه او مسئولینو ته یې سپارښتنې وکړې.
