د هلمند ولایت پوهنې رئیس د پوهنې وزارت د اسلامي زده کړو له معين سره وکتل
د هلمند ولايت پوهنې رئيس الحاج مولوي محمد عوض انصاري د پوهنې وزارت د اسلامي زده کړو له معين مولوي کرامت الله آخندزاده سره وکتل او په ياد ولايت کې يې د اسلامي زده کړو بنسټونو پر ستونزو خبرې وکړې.
په ياده کتنه کې د هلمند پوهنې رئيس د ياد ولايت د رسمي او خصوصي مدارسو د فعاليتونو، لاسته راوړنو او د ياد رياست د نويو پلانونو، د نوي تشکيلاتي جوړښت د نهايي کېدو، د مدارسو د جوړولو او د کار د څرنګوالي په اړه معلومات وړاندې کړل.
د پوهنې وزارت د اسلامي زده کړو معين د هلمند پوهنې ریاست فعالیتونه او لاسته راوړنې وستایلې او د لا ښه والي په موخه یې د دغه ریاست مشرتابه ته د یو لړ لارښوونو ترڅنګ د ستونزو په حل کې د همکارۍ ژمنه وکړه.
