د کابل او ولایتونو د پوهنې اړوند لنډ خبرونه
غزني
د غزني ولایت پوهنې ریاست د یاد ولایت د دیني مدارسو ۶۰ تنو مسئولینو او مهتممینو ته څلور ورځنی سیمینار جوړ او هغوی ته یې د تشکیل او کاري مېتودونو د چمتو کولو په برخو کې روزنه ورکړه.
تخار
د تخار ولایت پوهنې رئیس الحاج مولوي حزب الله مبشر د یاد ولایت په خواجه بهاوالدین ولسوالۍ کې د ذاکر عبدالشکور شهید او ابوبکر صدیق (رضي الله عنه) لېسو د احاطوي دېوال له جوړېدو څخه لیدنه او څارنه وکړه.
د دواړو ښوونځيو د احاطوي دېوالونو مالي لګښت یو میلیون او ۲۰۰ زره افغانۍ اټکل شوی دی.
کابل
د کابل ښار پوهنې ریاست اداري غونډه د پوهنې رئیس قاري عبدالباسط حقاني په مشرۍ د یاد ریاست د مسئولینو په ګډون جوړه شوه.
په دې ناسته کې د تطبیق شویو کړنو د ارزونې او د راتلونکو پلانونو پلي کېدو په اړه بحث وشو.
ننګرهار
د ننګرهار ولایت پوهنې رئیس مفتي حبیب حضرت حقاني د جلال آباد ښار اړوند د نصرت عالي لېسې اداري او تدریسي چارې وڅېړلې او ممتازو زده کوونکي یې د ستاینلیکونو په ورکولو سره وستایل.
پکتیا
د پکتيا ولایت پوهنې رياست، د ښوونځیو او مدارسو د زده کوونکو ترمنځ علمي سيالۍ پيل کړې.
د یاد ریاست مسئولین وایي، چې د دغه سيالیو موخه، د زده کوونکو د پوهاوي کچې لوړول وو او لسو ګټونکو زده کوونکو ته جاېزې هم ورکړل شوې.
