د پوهنې وزارت د سرچينو او اداري معين ارزګان او کندهار ولایتونو ته رسمي سفر وکړ
د پوهنې وزارت د سرچینو او اداري معين مولوي صبغت الله وصيل، ارزګان او کندهار ولایتونو ته د خپل رسمي سفر په ترڅ کې، د ارزګان له والي او د یادو ولایتونو له پوهنې رئيسانو سره وکتل.
د پوهنې وزارت د سرچينو او اداري معين د اروزګان له والي مولوي محمد علي جان احمد سره د کتنې پر مهال، په ياد ولايت کې د پوهنې په لاس ته راوړونو او ستونزو باندې تفصيلي خبرې وکړې او له پوهنيز نظام سره يې د دغه ولايت دمشرتابه هڅې وستايلې.
ورپسې نوموړي د ارزګان له پوهنې رئیس مولوي احمد سره په کتنه کې، دواړو لورو د ياد ولایت د پوهنې وضعیت دلاښه والي په اړه نظرونه تبادله کړل.
د اروزګان ولايت پوهنې رئيس اعتراف وکړ، چې له بده مرغه په تېرو شلو کلونو کې داروزګان ولايت پوهنې ته هېڅ پاملرنه نه ده شوې او د ښوونځيو جوړېدو په ګډون يې، د مدارسو او دارالعلومونو د پراختيا په برخه کې د پوهنې وزارت له مشرتابه څخه د پاملرنې غوښتنه وکړه.
د کندهار ولايت پوهني رئيس هم ياد ولايت ته د سرچينو او اداري معين او د پوهني وزارت د اداري پلاوي د ورتګ هرکلى وکړ. همدارنګه د دواړو لورو تر منځ، د نوي تشکيلاتي جوړښت د پلي کېدو په ګډون، د پوهنې وزارت د درې کلن ملي پلان په اړه هر اړخیز بحثونه وشول.
په پاى كې د پوهنې وزارت د سرچينو او اداري معين د دواړو ولایتونو پوهنې ریاستونو هر اړخيزه ارزونه وکړه او د دوی د ستونزو د حل ژمنه یې وکړه.
