له ولایتونو څخه د پوهنې خبرونو لنډیز
کابل
د کابل ولایت د علماوو شورا مرستیال شیخ ذبېح الله راشد، د کابل ښار له پوهنې رئیس قاري عبدالباسط حقاني سره وکتل.
په یاده کتنه کې دواړو لوریو د ښوونځیو د ښوونیزو پلانونو او پروګرامونو په اړه خبرې او نظرونه تبادله کړل.
دغه راز ياد پلاوي په ښوونځيو کې د شرعي احکامو د بشپړ پلي کېدو غوښتنه وکړه.
د یو بل خبر له مخې:
د کابل ښار پوهنې رئیس د چارو د لاښه پرمخ بېولو په موخه، د یاد ریاست د مرکزي دفتر له څانګو څخه لیدنه وکړه.
دغه راز نوموړي د کارکوونکو ستونزې له نیږدې وارزولې او د لا زیاتو کاري آسانتیاوو په رامنځته کولو کې یې د همکارۍ ژمنه وکړه.
همدارنګه:
د کابل ښار پوهنې رئیس د مالیې وزارت له مسئولینو او د دغه وزارت د مالي مدیریت د عمومي ریاست له چارواکو سره وکتل او د مراجعینو د مالي اسنادو د بهیر د لنډولو او هغوی ته د لازمو آسانتیاوو د برابرولو په موخه یې خبرې وکړې.
سرپل
د سرپل ولایت سوزمه قلعه ولسوالۍ د ۱۵۰ تنو آمرینو، سرښوونکو او ښوونکو لپاره د « امارت پېژندنې، تدریسي اصولو او عقیدوي مسایلو» په تړاو شپږ ورځنی سیمینار د دغه ولایت د پوهنې ریاست له خوا پیل شو.
پروان
د پروان ولایت پوهنې رئیس مولوي سید محمد فیضي تر څارنې لاندې، د چارو په ترسره کولو کې د ښه چلند په موخه غونډه جوړه شوه.
د پوهنې رئيس له مامورينو وغوښتل، چې له مراجعينو سره ښه او اسلامي چلند وکړي.
