د پوهنې وزارت سرپرست له لوري په غزني ولایت کې د یو باب دیني مدرسې بنسټ ډبره کېښودل شوه
د پوهنې وزارت سرپرست الحاج مولوي حبیب الله آغا او ورسره مل پلاوي، د غزني ولایت ګیلان ولسوالۍ ته د خپل رسمي سفر په ترڅ کې د "عظمیه" دیني مدرسې بنسټ ډبره کېښوده.
د پوهنې وزارت سرپرست د يادې دیني مدرسې د بنسټ مراسمو کې د همدغه ښوونیز بنسټ جوړېدل يو مهم ګام وباله او زياته يې کړه: دغه مدرسه د معياري زده کړو ترڅنګ د عصري زده کړو په برخه کې هم اغېزمنه تمامېږي.
نوموړي څرګنده کړه، پوهنې وزارت پلان لري او هڅه کوي، تر څو د مدارسو او ښوونځیو علمي کیفیت لاپسې لوړ او د زده کوونکو تعلیمي کچه پیاوړې کړي.
د یادولو وړ ده، د مدرسې دغه ودانۍ چې ۱۰ درسي ټولګي، یوه اداري خونه، یو محراب جومات له نورو اړینو ملحقاتو سره به ولري، د غزني ولایت ګیلان ولسوالۍ اړوند په شینکي کلي کې د همدې ولایت د یو تن ملي سوداګر په مالي مرسته په ۱۲ جرېبه ځمکه کې د ۶ مېلیونه افغانیو لګښت سره جوړېږي.
د سيمې خلکو هم په خپل ګاونډ کې د دغه ديني مدرسې پر جوړېدو خوښي څرګنده کړه.
د پوهنې وزارت مشرتابه د ښوونیز نظام په برخه کې د هېوادوالو د مرستو له امله مننه کوي.
