پکتيکا ولايت کې د ۳ مېليونه افغانيو په لګښت د يوې مدرسې د ودانۍ چارې پای ته ورسېدې
د پکتیکا ولایت پوهنې ریاست چارواکي خبر ورکوي، چې د مسئولینو له لوري د یحیی خېلو ولسوالۍ اړوند اسعدآباد پارک کلي کې د یو باب دیني مدرسې نوې ودانۍ، د مدارسو او ښوونځیو د ښوونکو، زده کوونکو، یو شمېر علماء کرامو او د سیمې د خلکو د استازو په حضور کې پرانیستل شوه.
د يادونې وړ ده، د دغې مدرسې د ودانۍ لګښت د يادې ولسوالۍ د اوسېدونکو له خوا ورکړل شوى او په ۲ جرېبه ځمکه کې چې د يادې ولسوالۍ د يو تن علمي شخصیت خليفه اسدالله له خوا وقف شوې، جوړه شوې ده.
په ياده مدرسه څه باندې درې مېليونه افغانۍ لګښت راغلى، چې ۳ درسي خونې او نور اړين ملحقات پکې جوړ شوي دي.
د پوهنې وزارت مشرتابه د پوهنې په برخه کې د خلکو د ملاتړ د هرکلي په ترڅ کې، د پکتیکا ولایت د یحی خېلو ولسوالۍ د خلکو د دغه نېک احساس قدرداني کوي.
