د پوهنې وزارت سرپرست غزني ولایت ته رسمي سفر وکړ
د پوهنې وزارت سرپرست الحاج مولوي حبیب الله آغا، د یاد وزارت د کیفیت تضمین د معین الحاج مولوي عبدالخالق صادق او ستر سلاکار مولوي عزیز احمد ریان په ملتیا، غزني ولایت ته ورسېد.
په پیل کې د پوهنې وزارت سرپرست او ورسره مل ټیم یې د یاد ولایت د پوهنې له رئیس الحاج مولوي میر نصیر احمد حسیني او نورو مسؤلینو سره په کتنه کې، د علاقې وړ موضوعاتو په اړه نظرونه تبادله کړل.
د غزني ولایت پوهنې رئیس، د پوهنې وزرات سرپرست او ورسره مل پلاوي ته ښه راغلاست ووایه او د دغه ریاست د لاسته راوړنو په اړه یې لنډ راپور مشرتابه ته وړاندې کړ، ویې ویل: د هېواد د ماشومانو سالمه روزنه یو لوی او ارزښتناک مسئولیت دی.
ورپسې د پوهنې وزارت سرپرست د غزني ولایت د پوهنې ریاست مسئولینو هڅې او کړنې وستایلې او هغوی یې وهڅول، تر څو په لازیاتې ژمنتیا سره خپلو کارونو ته دوام ورکړي او په دغه ولایت کې د پوهنې د لا پرمختګ لپاره هلې ځلې وکړي.
د یو بل خبر له مخې:
د پوهنې وزارت سرپرست د خپل کاري سفر د آجنډا له مخې، د غزني ولایت قره باغ ولسوالۍ ته سفر وکړ او د دغې ولسوالۍ له یو شمېر مدارسو او دارلایتامونو څخه د لیدنې پر مهال یې له مسئولینو او مدرسینو سره په کتنه کې، د مدرسینو ستونزې او وړانديزونه واورېدل او د يادو ستونزو د هواري په برخه کې يې د همکارۍ ژمنه وکړه.
له بلې خوا د قره باغ ولسوالۍ د پوهنې چارواکو او د یادې ولسوالۍ د ښوونیزو مرکزونو مسئولینو د پوهنې وزارت د سرپرست له ورتګ څخه خوښي څرګنده کړه او د هېواد بچیانو د روزنې په برخه کې یې په اسلامي او ملي روحیه ټینګار وکړ.
