بدخشان ولایت کې د ۴ مېلیونه افغانیو په ارزښت د یو باب دارالعلوم نوې ودانۍ پرانیستل شوه
د بدخشان ولایت یفتل پایان ولسوالۍ اړوند په پهن دره کلي کې د امام ابوحنیفه «رحمه الله» دارالعلوم رغنیزې چارې، چې څه موده وړاندې د سیمه ییزو خلکو له لوري په ۴ جرېبه ځمکه کې د ۴ مېلیونه افغانیو لګښت سره پیل شوې وې، د یو لړ مراسمو په ترڅ کې چې پکې د پوهنې ریاست مسئولینو، علماءکرامو او د سیمې خلکو ګډون درلود، پرانیستل شو.
د پوهنې مسئولینو په خپلو خبرو کې وویل، دغه دارالعلوم چې دوه بابه ۲ پوړیزه ودانۍ لري، په دوو بر خو (نارینه او ښځينه)وېشل شوی او له اړینو ملحقاتو سره ۷ درسي ټولګي، ۴ تالارونه لري، چې په دوه وختونو کې د ۳۰۰ تنو زده کونکو ظرفیت لري.
د سيمې خلکو هم په خپلو خبرو کې د دغه دارالعلوم پر پرانيستلو خوښي څرګنده او د پوهنې په برخه کې يې د خپلو مرستو د دوام خبره وکړه.
د پوهنې وزارت رهبري د پوهنې په برخه کې د خلکو له مرستو مننه کوي او قدرداني کوي.
