د خوست ولایت پوهنې ریاست کارکوونکو لپاره د "اداري پروسو ساده کولو" په اړه مسلکي سیمینار پرانیستل شو
د چارو ادارې لوی ریاست لخوا، د خوست ولایت پوهنې ریاست کارکوونکو لپاره د اداري پروسو ساده کولو په موخه دوه ورځنی روزنیز پروګرام پیل شو.
د یاد سیمینار د پرانیستې په مراسمو کې، چې د چارو ادارې د لوی رئیس محترم الحاج شیخ نورالحق انور، پوهنې رئیس محترم مولوي فیض الله جمال حقاني او د نورو سیمه ییزو ادارو د استازو په حضور کې ترسره شو، د پوهنې رئیس لومړی د چارو ادارې لوی رئیس او ورسره مل پلاوي ته ښه راغلاست ووایه او د دوی له ورتګ څخه یې مننه وکړه.
نوموړي د خپلې وینا په دوام، د اداري پروسو روښانه کولو او ساده کولو په برخه کې د چارو ادارې لوی ریاست له هڅو د ستاینې ترڅنګ، ټینګار وکړ چې په اداري چارو کې آسانتیا، روڼتیا او اغېزمنتوب د ښې او موثرې ادارې بنسټیز اصول ګڼل کېږي.
هغه څرګنده کړه: په اداري چارو کې ځینې ستونزې شتون لري چې د اړوندو څانګو د ورځني کار په وړاندې ځنډ او خنډ رامنځته کوي او موږ هیله لرو چې دا سیمینار زموږ کارکارکوونکو ته د اداري چارو د چټکو او مؤثرو کړنو ترسره کولو لپاره اړین مهارتونه ور زده کړي.
ورپسې د افغانستان. ا.ا. د چارو ادارې لوی ریاست د اداري اصلاحاتو او ملکي خدمتونو ریاست د اداري پروسو ساده کولو ادارې رئیس ښاغلي بریالي ابدالي، د سیمینار د موخو، محتوا او د هغو د عملي کولو په اړه ګډونوالو ته مفصل معلومات ورکړل، ویې ویل چې دا پروسه له مرکزي څانګو څخه پیل شوې او خوست ولایت لومړی ولایت دی چې د اداري چارو د ساده کولو په اړه سیمینار پکې ترسره کېږي.
نوموړي زیاته کړه: دا روزنیز پروګرام به د هېواد په کچه د ټولو څانګو د منسوبینو لپاره پلی شي او له علمي کېدو وروسته به له نږدې وڅارل شي.
د ادري چارو د پروسې سادهکولو رئیس له ټولو ګډونوالو وغوښتل چې د سیمینار منځپانګه په دقت سره زده او په عملي توګه یې په خپلو ورځنيو اداري چارو کې پلې کړي.
د یادونې وړ ده چې په دې سیمینار کې به د اداري اصلاحاتو، د پروسو ساده کولو، د سیسټماتیکو اسنادو مدیریت، د مراجعینو لپاره د خدماتو او اداري روڼتیا په څېر موضوعات تدریس شي.
