د پوهنې وزارت مشرتابه د کابل ښار د ښوونځیو له آمرینو سره وکتل
د پوهنې وزیر محترم الحاج مولوي حبیب الله آغا په داسې حال کې چې د یاد وزارت معینانو، یو شمېر مرکزي رئیسانو او د کابل ښار پوهنې رئیس محترم مولوي جنت ګل عزیزي یې هم ملتیا کوله، د ښوونځیو له آمرینو سره وکتل.
غونډه د مالي او اداري معین محترم الحاج مولوي صبغت الله وصیل په وینا پیل شوه.
نوموړي د مېلمنو هرکلی وکړ او له هغوی سره یې د ناستې آجنډا شریکه کړه.
ورپسې د پوهنې محترم وزیر آمرینو ته د ښوونې روزنې پر محوریت ټینګار وکړ او زیاته یې کړه: د هر هېواد پرمختګ د پوهې په واسطه ممکن دی، له دې جهته زدهکوونکي باید په دیني او عصري علومو سمبال کړو.
نوموړي د ښوونځیو له آمرینو څخه وغوښتل چې ښوونکي باید هره ورځ زدهکونکي وارزوي او له هغو څخه د ورځنیو درسونو په مورد پوښتنې ترسره کړي.
ورپسې د یاد وزارت د ښوونې او روزنې پخواني معین محترم الحاج مولوي سخاءالله سعید هم په خپله وینا کې وویل: "موږ زدهکونکي تاسو ته سپارلي دي؛ هغوی ته هغه ډول روزنه ورکړئ لکه څنګه چې تاسو خپل ماشومان روزئ. زدهکوونکي د هېواد د راتلونکي معماران دي او هغوی ته باید اوسمهال څخه ښه ښوونه او روزنه ورکړل شي."
د پوهنې وزارت د کیفیت تضمین معین محترم الحاج مولوي عبدالخالق صادق د خپلو ویناوو په دوام، د عصري علومو په برخه کې د پوهنې وزارت د مشرتابه بشپړې ژمنې ته اشاره وکړه او آمرینو ته یې وویل: "هر آمر باید خپل کار ته ژمن وي، ځکه چې که موږ ژمن نه یو، نو موږ به د خدای تعالی په وړاندې مسئول یو. د زدهکوونکو د زدهکړې کیفیت ښه کړئ، د پوهنې وزارت قوانین او مقررات په بشپړه توګه پلي کړئ."
د غونډې په پای کې د کابل ښار د ښوونځیو آمرینو خپل پرمختګونه او ستونزې د پوهنې وزارت مشرتابه سره شریکې کړې، چې د رهبرۍ له لوري ورته د ستونزو د حل لپاره ډاډ ورکړل شو.
غونډه دعائیې په لوستلو سره پای ته ورسېده.
