د کابل له عالي عربي دارالعلوم څخه ۲۱۷ تنه طلاب فارغ شول
نن د کابل عالي عربي دارالعلوم د ۲۱۷ تنو طلابو د فراغت شانداره مراسم، د پوهنې وزارت مشرتابه، یو شمېر مرکزي رئیسانو، د اسلامی ا.مارت لوړپوړو چارواکو، دیني علماءکرامو، استادانو، زده کوونکو او ګڼ شمېر مېلمنو په پراخ ګډون ترسره شول.
غونډه د قرآن عظیم الشان د څو مبارکو آیتونو په خوږ تلاوت سره پرانیستل شوه؛ ورپسې د پوهنې وزارت د کیفیت تضمین معین محترم الحاج مولوي عبدالخالق صادق د فارغانو بریاوې وستایلې او له هغوی یې وغوښتل چې د خپلو نیتونو د پاکوالي سربېره د علومو زده کړې ته دوام ورکړي.
نوموړي په ټولو ښوونیزو بنسټونو کې د معیاري زده کړو پر پراختیا ټینګار وکړ.
همدارنګه د اسلامي زده کړو معین محترم الحاج مولوي کرامت الله آخندزاده طلابو ته د فراغت مبارکي وویله او زیاته یې کړه چې پوهنې وزارت هوډ لري ترڅو د ټولو تعلیمي بنسټونو تدریسي بهیر لاپسې معیاري کړي.
نوموړي څرګنده کړه چې د ټولنې د واقعي پرمختګ لار د علم، پوهې او معنوي روزنې له لارې شونې ده.
په ورته مهال، د پوهنې وزارت اداري او مالي معین محترم الحاج مولوي صبغت الله وصیل په خپلو خبرو کې د دیني علماءکرامو د ټولنیزو او اخلاقي مسئولیتونو یادونه وکړه او طلاب یې وهڅول چې د راتلونکو نسلونو د سالمې روزنې، فکري رهبري او ټولنیز اصلاح لپاره خپل علمي رسالت په اخلاص سره ترسره کړي.
د یادونې وړ ده، چې د همدغه دارالعلوم د فارغانو له جملې څخه ۵۲ تنه یې د قرآن کریم له حفظ دورې، ۱۴۰ تنه په دولسم پاس/ ثانویه درجه او ۲۵ تنه په څوارلسم پاس/فوق ثانویه درجو فارغ شول.
یاد شانداره مراسم د فارغانو پر سرونو د فضیلت پګړیو تړلو، تصدیق پاڼو وېشلو او دعائیې لوستلو سره پای ته ورسېدل.
