د پوهنې وزارت د دعوت او ارشاد محترم رئیس د فراه ولایت له پوهنې چارواکو سره وکتل
د پوهنې وزارت د دعوت او ارشاد رئیس محترم الحاج مولوي جمعه خان سروري په رسمي سفر فراه ولایت ته لاړ او د یاد ولایت له پوهنې رئیس محترم الحاج مولوي اخترمحمد زعیم او چارواکو سره یې وکتل.
پلاوي د خپل سفر موخه د پوهنې له چارواکو سره لیدنه او د دغه ولایت د پوهنې په ادارو کې د محترم مشرتابه د لارښوونو پلي کولو له پروسې بیاکتنه وبلله.
د دعوت او ارشاد محترم رئیس له ټولو چارواکو وغوښتل چې د الهي احکامو پلي کولو، د رسول الله «صلی الله علیه وسلم» د سنتو په تعقیب، د اسلامي مشرتابه د لارښوونو عملي کولو او د دیني حلقو په ورځنيو درسونو کې په فعاله توګه د منسوبینو ګډون لپاره ټولې هڅې وکړي.
ورپسې د یاد ولایت پوهنې رئیس د پلاوي هرکلی وکړ، هغوی ته یې په ښوونیزو ادارو کې د دعوت او ارشاد ریاست د پروګرامونو پلي کولو ډاډ ورکړ او د پلاوي سره یې د لازیاتې همکارۍ ژمنه وکړه.
