سرپل ولایت کې د ۶۵۰ زره افغانیو په لګښت د یوې دیني مدرسې د ودانۍ بنسټ ډبره کېښودل شوه
د سرپل ولایت سیدآباد ولسوالۍ اړوند «د منبعالعلوم روحانیه» دیني مدرسې د نوې ودانۍ بنسټ ډبره، د یادې ولسوالۍ پوهنې مسوولینو په حضور کې کېښودل شوه. دغه ودانۍ پر نیم جریب ځمکه کې، چې د سیمې د یو تن علمپرور اوسېدونکي له لوري وقف شوې، جوړېږي.
د چمتو شوي پلان له مخې، پورته ذکر شوې ودانۍ به په یو پوړ کې جوړه شي، چې شپږ درسي ټولګي او دوه اداري خونې به ولري. د یادې ودانۍ ټولیز لګښت شاوخوا ۶۵۰ زره افغانۍ اټکل شوی دی.
د یاد ولایت پوهنې چارواکي وایي، د دغې مدرسې جوړول به د سیمې د ماشومانو د دیني او عصري زدهکړو لاسرسي په ښهوالي کې مهم رول ولوبوي او زدهکوونکو ته به د زدهکړو مناسب چاپېریال برابر کړي.
