د هېواد په سړو سیمو او ولایتونو کې د مدارسو او ښوونځیو څلور نیم میاشتنۍ ازموینې پیل شوې
د پوهنې وزارت د لایحې له مخې نن (۱۶/۰۴/۱۴۰۴ نېټه)، د هېواد په سړو سیمو او ولایتونو کې د مدارسو او ښوونځیو څلور نیم میاشتنۍ ازموینې په مرکز او ذکر شویو ولایتونو کې د پوهنې ریاستونو د مسئولینو او ښوونیزې څارنې استازیو په حضور کې پیل شوې.
د مرکز او د هېواد د سړو ولایتونو له پوهنې ریاستونو څخه د ترلاسه شویو راپورونو له مخې، د پورته ذکر شویو ازموینو د پیل په مراسمو کې د پوهنې ریاستونو چارواکو، استادانو او ښوونکو ته په ازموینه کې د عدالت او بشپړې روڼتیا د تامین په خاطر ویناوې وکړې او له زدهکونکو څخه یې وغوښتل چې نظم او ډسپلین ته په پاملرنې سربېره د ازموینو لپاره په بشپړ چمتووالی سره خپلو ټولګیو ته حاضر شي.
هغوی زده کونکو ته یادونه وکړه: تاسو باید درسونه یوازې د نمرې ترلاسه کولو لپاره ونه لولئ، بلکې لوړو موخو ته په رسېدلو او د خپلې پوهې کچې لوړولو په هدف سره په خپلو زدهکړو کې شپه ورځ هڅې وکړئ؛ ترڅو په دې اساس تاسو په راتلونکي کې د پوهې لوړې کچې ته ورسېږئ.
د یادونې وړ ده چې د پورته ذکر شویو ولایتونو د پوهنې ریاستونو له پلان سره سم باید چارواکي په دوامداره توګه د ازموینو جریان وڅاري.
