د پوهنې وزارت دعوت او ارشاد ریاست پلاوي د زابل ولایت له پوهنې مسئولینو سره وکتل
د پوهنې وزارت دعوت او ارشاد ریاست پلاوي زابل ولایت ته د خپل رسمي سفر په ترڅ کې، د یاد ولایت پوهنې ریاست د غونډو په تالار کې له ښوونیزو مسئولینو، آمرینو او د مرکز قلات ښار د ښوونځیو له مدیرانو سره وکتل.
غونډه د قرآنکریم د څو مبارکو آیتونو په تلاوت سره پیل شوه؛ ورپسې د زابل ولایت پوهنې رئیس محترم الحاج مولوي ګل ولي متقي مېلمنو ته د ښه راغلاست ترڅنګ، د پلاوي د سفر موخه روښانه او د غونډې د پیل وینا یې واوروله.
همدارنګه د پوهنې وزارت دعوت او ارشاد ریاست د پلاوي په استازیتوب محترم مولوي بسمالله حسان د خپلو خبرو پرمهال، د پوهنې منسوبینو او کارکوونکو د صورت او سیرت د سمون پر ارزښت ټینګار وکړ او د اسلام د ستر پیغمبر نبي کریم ﷺ مبارک ارشادات یې ګډونوالو ته تشریح کړل.
غونډه په مبارکې دعائیې سره پای ته ورسېده.
