د پوهنې وزارت د دعوت او ارشاد ریاست د کړنو «اوونیز راپور»
د پوهنې وزارت د دعوت او ارشاد ریاست مسئولینو په تېره اوونۍ کې، د کابل ښار دبېلابېلو ښوونیزو ناحیو اړوند لکه؛طلوع دانش، نصیراحمد عبادي، اکسون، واک، کابل سنټر، کاوش او کهکشان خصوصي تعلیمي مرکزونو څخه لیدنې وکړې او د هغوی ښوونیز او روزنیز وضیعت یې له نږدې وارزاوه.
دغه راز د دعوت او ارشاد ریاست مبلغینو د یادو ښوونیزو بنسټونو مسئولینو ته په یو شمېر پوهنیزو برخو کې د نیمګړتیاوو له منځه وړلو، په ورځنیو چارو کې د شرعي مسایلو پر بشپړ تطبیق او د ښوونیز کیفیت لاښه والي په موخه لازمې سپارښتنې وکړې.
له بلي خوا د یادو بنسټونو مسئولینو د پوهنې وزارت د دعوت او ارشاد ریاست د پلاوي له ورتګ څخه خوښي څرګنده او ژمنه یې وکړه، چې د یاد ریاست د لارښوونو سره سم به خپلې ورځنۍ چارې پلې کړي.
همدارنګه د یاد ریاست رسمي پلاوي چي په پلان کې لري تر څو د هېواد ۱۱ ولایتونو ته سفرونه وکړي، نن د زابل ولایت له پوهني ریاست څخه لیدنه وکړه.
په ورته مهال د دعوت او ارشاد ریاست مسئولینو د پوهنې وزارت د مرکزي هستې کارکوونکو ته اصلاحي وینا وکړه، د هغوی اداري کړنې یې وکتلې او ور څخه یې وغوښتل، تر څو خپلو مسئولیتونو او دندو ته په جدي ډول متوجې واوسي او د مراجعینو کارونه پرته له ځنډ څخه په ټاکلي وخت سرته ورسوي.
دغه راز دعوت او ارشاد ریاست ته له کابل ښار او د ولایتونو له پوهنې ریاستونو څخه لاس ته راغلي راپورونه ښیي چې؛
په تېره اوونۍ کې له ټاکل شوي مهالوېش سره سم د تعلیمي مرکزونو اړوندو کارکوونکو ته د دیني درسونو لړۍ په نورمال ډول روانه وه.
