د پوهنې وزارت د دعوت او ارشاد ریاست پلاوی پکتیا ولایت ته ولاړ
د مولوي محمد نعیم عمیر په مشرۍ د پوهنې وزارت د دعوت او ارشاد ریاست پلاوی د یو رسمي سفر په ترڅ کې پکتیا ولایت ته ورسېد.
په پيل کې یاد پلاوي د همدغه ولایت له پوهنې رئیس الحاج مولوي عبدالقیوم، مسئولینو او دښوونځیو له آمرینو سره په لیدنه کې وویل: د نفس تذکیه او د آمرینو اطاعت پر موږ واجب دی او عبادات د روح غذا ده.
په دغه کتنه کې یاد پلاوي له پوهنې مسئولینو وغوښتل چې ښوونکو او زده کوونکو ته هره ورځ د نيم ساعت لپاره د اسلام اساساتو کتاب تدريس کړي او د ټولو ښوونیزو بنسټونو کارکوونکي، ښوونکي او زده کوونکي باید خپل صورت او سیرت د اسلام د ستر پیغمبر حضرت محمد«صلی الله علیه وسلم» په سنتو برابر کړي.
له بلې خوا د پکتیا پوهنې رئیس د ورغلي پلاوي له سفر څخه د هرکلي ترڅنګ، د دعوت او ارشاد ریاست د ټولو لارښوونو او پلانونو د پلي کېدو ډاډ ورکړ.
