د پوهنې وزارت د ښوونې او روزنې معین کونړ ولایت ته په رسمي سفر ولاړ
د افغانستان.ا.ا. د مشرتابه عالي مقام د لارښوونې سره سم د هېواد د ولایتونو په ولسوالیو کې د مدارسو لپاره د لیلیو جوړولو په موخه، د پوهنې وزارت د ښوونې او روزنې معین الحاج مولوي سخاء الله سعید کونړ ولایت ته په رسمي سفر ولاړ.
د یاد وزارت د نشراتو او عامه اړیکو ریاست د معلوماتو له مخې، کونړ ولایت ته د پوهنې د معین د سفر موخه، په ولسوالیو کې د دیني مدارسو لپاره د لیلیو د جوړولو لپاره د مناسبو ځایونو ټاکل، د پوهنې ریاست له کړنو ارزونه، د پوهنې مسئولینو د کار او مسلکي وړتیاوو لوړولو په تړاو د ښوونیز ورکشاپ جوړېدل وبلل.
د پوهنې وزارت معین د یاد ولایت د پوهنې له مسئولینو، یو شمېر علماوو او مشرانو سره د ښونیزو بنسټونو د پیاوړتیا او د لیلیو جوړولو په اړه خبرې او نظرونه تبادله کړل.
ځايي علماوو د افغانستان.ا.ا. د مشرتابه عالي مقام له دغه نېک اقدام څخه خوښي څرګنده کړه او د پوهنې وزارت له کړنو څخه یې خپل ملاتړ څرګند کړ.
ټاکل شوې ده، د پوهنې وزارت د ښوونې او روزنې معین د خپلې کاري آجنډا له مخې، د دغه ولایت د پوهنې رئیس په ملتیا په بېلابېلو ولسوالیو کې د مدارسو د لیلیو لپاره د مناسبو ځایونو ټاکلو په اړه د پوهنې له رئیس، علماوو، د سیمه ییزو ادارو له مسئولینو او قومي مشرانو سره غونډې او مشورې وکړي.
