د پوهنې وزارت د کیفیت تضمین محترم معین په رسمي سفر بدخشان ولایت ته ورسېد
د پوهنې وزارت د کیفیت تضمین معین محترم الحاج مولوي عبدالخالق صادق، د ثانويه او مافوق ثانويه ازموینو له پروسې څخه د څارنې، ارزونې او بیاکتنې لپاره بدخشان ولایت ته ورسېد.
لومړی د پوهنې محترم معین د بدخشان له والي محترم الحاج مولوي محمد اسمعیل غزنوي، پوهنې رئیس او مسئولینو سره په کتنه کې د ښوونې او روزنې په بهیر هر اړخیزې خبرې وکړې.
په دې غونډه کې، د پوهنې وزارت د کیفیت تضمین محترم معین، د بدخشان پوهنې ریاست د فعالیتونو او هڅو ستاینه وکړه او په خپلو خبرو کې یې وویل: (پوهنه د یو ملک د ملا تیر جوړوي؛ ټول کادرونه په پوهنه کې تر روزنې وروسته ټولنې ته وړاندې کېږي).
د بدخشان والي هم د علم او پوهې پر اهمیت د ټینګار ترڅنګ، له خپل لوري د بشپړې همکارۍ ډاډ وکړ.
ورپسې د یاد ولایت پوهنې رئیس محترم الحاج مولوي محمد طاهر جواد د پوهنې اړوندو فعالیتونو، لاسته راوړنو او پروګرامونو په اړه مفصل راپور د پوهنې وزارت محترم معین ته وړاندې کړ، چې هرکلی یې وشو.
