د پوهنې وزارت سرپرست د قرآن کریم د یو تن مخکښ حافظ په ستاینغونډه کې ګډون وکړ
د پوهنې وزارت سرپرست الحاج مولوي حبیب الله آغا کندهار ولایت ته د خپل رسمي سفر په ترڅ کې، د یاد ولایت له پوهنې رئیس الحاج مولوي فخرالدین نقشبندي په ملتیا، د قرآن کریم د یو تن هغه مخکښ حافظ په ستاینغونډه کې ګډون وکړ، کوم چې د افغانستان د دیني مدارسو په کچه یې د قرآن کریم د حسن قرائت سیالیو کې لومړی مقام خپل کړی و.
نوموړی حافظ د پوهنې وزارت د سرپرست له لوري په نقدي ډالیو سره وویاړل شو.
قاري عبدالغني د عبدالظاهر زوی چې په اصل کې د غور ولايت اوسېدونکی دی او د کندهار ښار په نهمه ناحیه کې اوسېږي، د هېواد په کچه یې د حسن قرائت په سيالۍ کې لومړی مقام تر لاسه کړ.
په پام کې ده چې نوموړی حافظ د افغانستان په استازیتوب په قطر کې د ۵۳ هېوادونو ترمنځ د حسن قرائت په نړیوالو سیالیو کې هم ګډون وکړي.
